Крыніцы: Расійцы рыхтуюць паказальны «суд» над палоннымі ў Марыупалі. У філармоніі ўсталёўваюць клеткі

Расійцы збіраюць турэмныя клеткі на сцэне філармоніі ў Марыупалі, каб зладзіць паказальны судовы працэс над ваеннапалоннымі. Пра гэта паведамілі ў Марыупальскім гарсавеце.

«Цяпер на сцэне марыупальскай камернай філармоніі расійскія акупанты збіраюць турэмныя клеткі. Дыяметр арматуры — 20 мм. Захопнікі плануюць у верасні зладзіць паказальны «суд» над абаронцамі Украіны», — гаворыцца ў паведамленні.

Гарадскі галава Вадзім Бойчанка, каментуючы гэта, адзначыў, што расійскія акупанты працягваюць грэбаваць усімі міжнароднымі нормамі.

«Яны працягваюць памнажаць ваенныя злачынствы, дэманструючы грэбаванне да ўсяго цывілізаванага свету», — адзначыў ён.

Мэр Марыупаля заклікаў сусветную супольнасць, ААН і Чырвоны Крыж умяшацца ў сітуацыю і дамагчыся захавання правілаў абыходжання з ваеннапалоннымі.

Нагадаем, у ноч на 29 ліпеня на тэрыторыі былой папраўчай калоніі ў пасёлку Яленаўка Данецкай вобласці прагрымеў выбух. Быў знішчаны будынак, у якім утрымліваліся ўкраінскія ваеннапалонныя, выведзеныя з завода «Азоўсталь».

Расія абвінаваціла ў трагедыі УСУ. Па даных расійскага боку, загінула больш за 50 украінскіх абаронцаў, колькасць параненых невядомая.

Украінскі бок заявіў, што выбух у Яленаўцы быў расійскім тэрарыстычным актам з мэтай утойвання вайсковых злачынстваў, дыскрэдытацыі Узброеных Сіл Украіны, зрыву паставак зброі. Кіеў патрабуе ад ААН і Чырвонага Крыжа неадкладна адрэагаваць на тэракт і накіраваць на тэрыторыю калоніі інспекцыйную місію.

Па даных украінскай выведкі, тэракт здзейснілі найміты са складу ПВК «Вагнера» па асабістым указанні фактычнага кіраўніка названай ПВК пуцінскага «кухара» Яўгена Прыгожына.

Паводле unian.net.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: