Расія прызнала ўкраінскі полк «Азоў» «тэрарыстычнай арганізацыяй»

Вярхоўны суд РФ прызнаў украінскі полк «Азоў» тэрарыстычнай арганізацыяй. Дзейнасць «Азова» у Расіі цяпер забароненая. Адпаведную заяву ў суд падаў генпракурор РФ.

«Адміністрацыйную заяву генеральнага пракурора задаволіць, прызнаць украінскае ваенізаванае падраздзяленне «Азоў» тэрарыстычнай арганізацыяй і забараніць яго дзейнасць на тэрыторыі Расійскай Федэрацыі», — гаворыцца ў рашэнні суда, апублікаваным у аўторак, перадае «Інтэрфакс».

Цяпер, паводле расійскага заканадаўства, вайскоўцаў палка павінны прыцягваць да крымінальнай адказнасці.

Пасля ўзяцця расійцамі Марыупалю ў палон патрапілі дзясяткі азоўцаў. Як гэтае рашэнне паўплывае на іх лёс, пакуль невядома.

Полк «Азоў» з'яўляецца кадравым падраздзяленнем Узброеных сіл Украіны.