Сын канструктара расійскіх баявых беспілотнікаў — спецыяліст па раззбраенні ў ААН
Жонка і сын канструктара беспілотніка-камікадзэ «Lancet» Аляксандра Захарава жывуць у Вялікабрытаніі і з 2018 года валодаюць кватэрай коштам паўтара мільёна фунтаў стэрлінгаў. А за год вайны структуры Мінабароны РФ закупілі ў кампаніі канструктара беспілотнікі амаль на 39 мільёнаў долараў.
Аляксандр Захараў з «Ланцэтам». Фота: Канцэрн «Калашнікаў»
«Пакуль канструктар Аляксандр Захараў узбройвае расійскую армію, яго сын Лаўрэнцій Захараў працуе ў Інстытуце праблем раззбраення ААН». Пра гэта піша выданне «Важные истории».
Жонка і сын стваральніка расійскіх баявых беспілотнікаў «Ланцэт» Аляксандра Захарава — Святлана і Лаўрэнцій Захаравы — з 2018 года валодаюць кватэрай коштам 1,5 мільёна фунтаў стэрлінгаў (амаль 2 мільёны долараў. — Рэд.) у элітным раёне Лондана.
Вялікабрытанія наклала санкцыі на кампанію «TST LLC» (ТАА «ЦСТ») — вытворцу беспілотнікаў, але не на сям'ю Захарава.
Паведамляецца, што бізнесам па вытворчасці беспілотнікаў займаецца і сям'я Захарава — жонка Святлана, сын Мікіта і дачка Марыя.
Напрыклад, для вытворчасці «Ланцэтаў» выкарыстоўваюцца замежныя камплектуючыя, забароненыя да пастаўкі ў Расію з-за санкцый.
Паводле рэестра нерухомасці Вялікабрытаніі, Захаравы набылі кватэру ў раёне Вестмінстэра, прыкладна за кіламетр ад Біг-Бэна і Букінгемскага палаца.
На сайце агенцтва нерухомасці размешчана абвестка аб продажы гэтай кватэры з фота і планам.
Плошча кватэры — менш за 100 квадратных метраў, у ёй тры спальні, гасцёўня, кухня-сталовая і балкон. У будынку ёсць трэнажорная зала і від на дах Біг-Бэна.
Лаўрэнцій Захараў — малодшы сын канструктара беспілотнікаў «Lancet» Аляксандра Захарава. Ён добра вучыўся і паспяхова пачаў сваю кар'еру, але ні тое, ні другое не дае падстаў меркаваць, што ён мог бы зарабіць грошы на такую кватэру ў Лондане.
Паводле LinkedIn, Лаўрэнцій Захараў жыве за мяжой як мінімум з 2015 года — з 16 гадоў.
Лаўрэнцій Захараў, спецыяліст па раззбраенні. Фота: UNIDIR
У Вялікабрытаніі ён скончыў школу, атрымаў вышэйшую адукацыю — ступень бакалаўра палітыкі, сацыялогіі і ўсходнееўрапейскіх даследаванняў ва Універсітэцкім каледжы Лондана, а затым ступень магістра канфлікталогіі ў Лонданскай школе эканомікі.
З ліпеня 2021 года Лаўрэнцій працаваў у агенцтвах ААН у Нью-Ёрку і Рыме, а з траўня 2023 года — у Інстытуце даследаванняў у галіне раззбраення ААН (UNIDIR) у Жэневе, Швейцарыя.
Сфера навуковых інтарэсаў Лаўрэнція Захарава, як паведамляецца на сайце UNIDIR — кіраванне зброяй і боепрыпасамі, размініраванне і гуманітарны доступ.
Святлана і Лаўрэнцій Захаравы не адказалі на запыты журналістаў.
Нагадваем:
Захараў — расійскі канструктар, які больш за 15 гадоў займаецца распрацоўкай і вытворчасцю беспілотнікаў. У цяперашні час самым вядомым яго вынаходніцтвам з'яўляецца беспілотнік-камікадзэ «Lancet».
Беспілотнік выкарыстоўваўся ў Сірыі, а цяпер шырока выкарыстоўваецца ў вайне з Украінай.
Кампанія Захарава «ТСТ» уваходзіць у канцэрн «Калашнікаў», але кантрольны пакет акцый належыць Захараву.
Раней «Важныя гісторыі» пісалі, што пры вытворчасці «Ланцэтаў» выкарыстоўваюцца заходнія камплектуючыя, пастаўкі якіх у Расію абмежаваны санкцыямі. Тым не менш «ЦСТ» удаецца абыходзіць гэтыя абмежаванні дзякуючы сетцы пастаўшчыкоў, якія імпартуюць у Расію патрэбныя дэталі з усяго свету. Два найбуйнейшыя пастаўшчыкі «ЦСТ» — «Аэраскан» і «Арыён» — належаць дзецям Аляксандра Захарава Мікіту і Марыі.
У 2022–2023 гадах структуры Мінабароны закупілі ў ТАА «ЦСТ» беспілотнікі амаль на 39 мільёнаў долараў.
Паводле «Еўрапейскай праўды», «Важные истории».