Талібы накіравалі байцоў для захопу Панджшэра. Лідар супраціву Масуд адмовіўся здаць рэгіён

Рух «Талібан» накіраваў сотні байцоў у правінцыю Панджшэр на паўночным усходзе Афганістана, бо «мясцовыя дзяржаўныя чыноўнікі адмовіліся перадаць яе мірным шляхам». Заяву талібаў цытуе AFP, піша «Радыё Свабода».

Афганскі рэгіён Панджшэр стаў самым вялікім да гэтага дня месцам супраціву талібам. Панджшэр размешчаны на поўначы ад Кабула, цяпер у гэтай правінцыі засяроджваюць свае ваенныя сілы прыхільнікі віцэ-прэзідэнта Афганістана Амрулы Салеха. Раней ён абвясціў сябе легітымным кіраўніком дзяржавы і заклікаў супраціўляцца талібам.
Другі лідар супраціву, Ахмад Масуд-малодшы — сын знакамітага палявога камандзіра і былога міністра абароны Ахмада Шаха Масуда, які ў ХХ стагоддзі змагаўся спачатку з савецкай арміяй, а потым і з урадам Махамада Наджыбулы.
22 жніўня талібы запатрабавалі ад Ахмада Масуда-малодшага на працягу чатырох гадзін здаць Панджшэр, інакш удзельнікаў супраціву паабяцалі «пакараць». Лідар супраціву адхіліў ультыматум і адмовіўся здаваць рэгіён. У інтэрв'ю тэлекампаніі «Аль-Арабія» Масуд-малодшы заявіў, што гатовы да перамоў і кампрамісу з «Талібанам», каб пазбегнуць супрацьстаяння. Ён заклікаў сфармаваць шырокі ўрад нацыянальнага адзінства з удзелам талібаў. Аднак, калі яны адмовяцца ад дыялогу, вайна непазбежная, дадаў ён.
Талібы 15 жніўня ўвайшлі ў сталіцу Афганістана Кабул, занялі прэзідэнцкі палац і абвясцілі аб поўным кантролі тэрыторыі краіны. Прэзідэнт Афганістана Ашраф Гані пакінуў краіну і паляцеў у ААЭ.
Афіцыйны прадстаўнік талібаў Забіхула Муджахід правёў прэс-канферэнцыю і расказаў, якім будзе жыццё ў Афганістане пры іх уладзе. Ён анансаваў увядзенне законаў шарыяту, але запэўніў, што жанчынам дазволяць вучыцца і працаваць. Таксама ён абяцаў ператварыць Афганістан у краіну без наркотыкаў.