У выведцы ЗША высветлілі магчымую прычыну «Гаванскага сіндрому»

Амерыканская выведка даследавала «гаванскі сіндром». І лічыць, што прычынай маглі стаць імпульсы электрамагнітнай энергіі, асабліва ў радыёчастотным дыяпазоне, а таксама ультрагук, — гэта вынікае з рассакрэчаных матэрыялаў выведкі, паведамляе korrespondent.net

Прычынай «Гаванскага сіндрому» ў амерыканскіх службовых асоб магло стаць знешняе ўздзеянне ў выглядзе імпульсаў электрамагнітнай энергіі або ультрагуку. Пра гэта гаворыцца ў апублікаваным у сераду, 2 лютага, рассакрэчаным экспертным матэрыяле амерыканскай выведкі.

«Прыкметы і сімптомы анамальных інцыдэнтаў са здароўем сапраўдныя і пераканаўчыя... Набор прыкмет нельга лёгка растлумачыць вядомымі фактарамі навакольнага асяроддзя або медыцынскімі станамі, яны могуць быць звязаныя са знешнімі ўздзеяннямі», — гаворыцца ў выснове экспертаў выведвальнай супольнасці, які апублікавалі ЦРУ і офіс дырэктара Нацыянальнай выведкі ЗША.

Імпульсы электрамагнітнай энергіі, асабліва ў радыёчастотным дыяпазоне, а таксама ультрагук, але толькі на малых дыстанцыях, праўдападобна тлумачаць асноўныя характарыстыкі з'явы, у адрозненне ад іянізуючай радыяцыі, хімічных і біялагічных агентаў, інфрагуку або чутнага гуку, лічаць эксперты.

Апошні раз пра «Гаванскі сіндром» паведамлялася ў студзені, яго зафіксавалі ў дыпламатаў ЗША ў Жэневе і Парыжы.

Гаванскі сіндром — сукупнасць неўралагічных сімптомаў, якія характарызуюцца галавакружэннем, млоснасцю, галаўнымі болямі і праблемамі са слыхам і зрокам. Упершыню хвароба была выяўлена ў амерыканскіх дыпламатаў, ваенных і супрацоўнікаў ЦРУ на Кубе ў 2016 годзе. Таксама на яе пакутавалі чальцы дыпмісій у Еўропе, Кітаі, Паўднёвай Амерыцы. Дакладная прычына сіндрому не ўстаноўленая. Дзярждэпартамент ЗША мяркуе, што за магчымымі акустычнымі нападамі можа стаяць Галоўнае ўпраўленне Генштаба ВС РФ.