Землятрус у Турцыі і Сірыі. Загінула каля тысячы чалавек

Падземныя штуршкі адчуваліся ў суседніх краінах — ад Грэцыі і Арменіі да Егіпта. Турэцкае Упраўленне па надзвычайных сітуацыях паведаміла, што землятрус магнітудай 7,4 адбыўся ў раёне Пазарджык у правінцыі Кахраманмараш на глыбіні сем кіламетраў раніцай 6 лютага. 

Пазней адбыліся яшчэ 42 афтэршокі, магнітуда наймацнейшага з якіх склала 6,6.
Падземныя штуршкі адчуваліся ў некалькіх рэгіёнах Турцыі: Адане, Анкары, Антальі, Газіянтэпе, Кайсеры, Мерсіне, Трабзоне, Шанлыўрфе, а таксама ў Сірыі, Ліване, Іраку, Егіпце, Грэцыі, на Кіпры і ў Арменіі.

У Турцыі аб'яўлены самы высокі ўзровень трывогі. Улады краіны звярнуліся па міжнародную дапамогу.

Фота: агенцтва Sana

У Італіі абвясцілі аб небяспецы цунамі пасля землятрусу ў Турцыі, але неўзабаве апавяшчэнне было адменена.

На гэты момант вядома пра больш за 300 загінуўшых у Турцыі і суседняй Сірыі. Як паведамілі ў турэцкім агенцтве па надзвычайных сітуацыях, сама меней 76 чалавек загінулі і больш за 440 атрымалі раненні. У Сірыі загінулі 237 чалавек, пацярпелі яшчэ 639, паведаміла мясцовае Міністэрства аховы здароўя. Паведамляецца аб загінулых і пацярпелых у правінцыях Алепа, Латакія, Хама і Тартус.

У некалькіх турэцкіх і сірыйскіх гарадах абрынуліся будынкі. Толькі ў правінцыі Малатыя на ўсходзе Турцыі абрынуліся 140 будынкаў. Пасля землятрусу ў шэрагу турэцкіх раёнаў адбыліся пажары на прадпрыемствах у офісных будынках. Мясцовае прыватнае інфармацыйнае агенцтва «IHA» піша аб выбуху на газаправодзе ў правінцыі Хатай.

Сірыйская дабрачынная арганізацыя «Белыя каскі» заявіла, што паўночны захад Сірыі — «зона бедства». Паводле яе звестак, сотні людзей былі паранены і апынуліся пад заваламі.

Фота: агенцтва Sana
Паводле cnn.com і unian.net