Колькасць ахвяр землятрусу ў Турцыі і Сірыі перавысіла 4310 чалавек

На большай частцы поўдня Турцыі і поўначы Сірыі ўсю ноч працягвалася выратавальная аперацыя пасля двух магутных землятрусаў, у выніку якіх загінула больш за 4310 чалавек.

Першы землятрус магнітудай 7,8 адбыўся ў 04:17 па мясцовым часе 6 лютага, ачаг залягаў на глыбіні 17,9 км паблізу горада Газіянтэп на паўднёвым усходзе Турцыі. За ім услед больш за 40 афтэршокаў.

Затым прыкладна ў 13:30 па мясцовым часе адбыўся другі землятрус магнітудай 7,5. Яго эпіцэнтр знаходзіўся ў раёне Эльбістан у паўднёва-ўсходнім турэцкім рэгіёне Кахраманмараш.

Ахвярамі землятрусу сталі больш за 4310 чалавек. Толькі ў Турцыі пасля першага землятрусу загінула больш за 2900 чалавек, больш за 15 000 атрымалі раненні. У суседняй Сірыі загінула больш за 1400 чалавек.

Усю ноч у абедзвюх краінах працягвалася выратавальная аперацыя па пошуку людзей, якія апынуліся пад заваламі пасля абвальвання тысяч будынкаў.

Краіны, уключаючы ЗША і Паўднёвую Карэю, адпраўляюць у рэгіён дапамогу пасля таго, як Турцыя звярнулася да свету з такім заклікам.

Прэзідэнт Чырвонага Паўмесяца Керэм Кінік папрасіў людзей не ездзіць на сваіх аўтамабілях у зоны землятрусу, каб аказаць гуманітарную дапамогу. Бяспечней прывозіць коўдры, цёплую вопратку і абутак у пункты збору, адкуль потым яна будзе дастаўлена ў пацярпелыя рэгіёны.

«Аўтамабілі праваліліся ў 50-метровы разлом на дарозе. На дарогах снег і галалёд», — папярэдзіў ён.

Маразы, снег і дождж абцяжарваюць пошук тых, хто выжыў пад абломкамі паваленых будынкаў. Паводле слоў відавочцаў, яны чуюць галасы пахаваных пад руінамі людзей.

Адзін мужчына ў Хатаі, правінцыі на поўдні Турцыі, у слязах апісваў агенцтву «Reuters» пакутлівае чаканне ратавальнікаў.

«Яны крычаць, яны кажуць "Ратуйце нас", але мы не можам іх выратаваць... З раніцы тут ніхто не з'явіўся», — распавёў жыхар Хатая.

Паводле BBC.