ЗША выдзеляць Усходняй Еўропе $ 1 млрд на зніжэнне залежнасці ад Расіі

Дзяржаўны сакратар ЗША Майкл Пампеа падчас выступу на Мюнхенскай канферэнцыі па бяспецы заявіў, што яго краіна выдзеліць $ 1 млрд краінам цэнтральнай і ўсходняй Еўропы, якія ўваходзяць у «Ініцыятыву трох мораў», паведамляе AFP.

«Ініцыятыва трох мораў» — пагадненне аб супрацоўніцтве, якое ў 2016 годзе падпісалі дзяржавы, размешчаныя паміж Адрыятычным, Балтыйскім і Чорным морам. Удзельнікамі аб'яднання з'яўляюцца Аўстрыя, Чэхія, Славакія, Харватыя, Венгрыя, Славенія, Румынія, Балгарыя, Польшча, Літва, Латвія і Эстонія. За выключэннем Аўстрыі, усе яны з'яўляюцца членамі НАТА, а да канца 1980-х з'яўляліся часткай сацыялістычнага лагера.
Паводле яго слоў, грошы будуць выдзелены праз Фінансавую карпарацыю па міжнароднаму развіццю (дзяржаўная ўстанова ЗША). У Вашынгтоне разлічваюць, што з іх дапамогай атрымаецца стымуляваць прыватных інвестараў развіваць энергетыку краін, каб знізіць іх залежнасць ад Расіі.
Таксама кіраўнік амерыканскага знешнепалітычнага ведамства зноў заявіў, што ЗША выступаюць супраць завяршэння будаўніцтва трубаправода «Паўночны паток - 2», які ў Вашынгтоне разглядаюць як яшчэ адзін рычаг ціску Масквы на саюзнікаў, перадало Reuters.
Нагадаем, раней падчас візіту ў Мінск Пампеа заявіў, што ЗША гатовыя забяспечыць Беларусь нафтай «на 100%».
Таксама Злучаныя Штаты гатовыя пастаўляць Беларусі газ праз Клайпедскі тэрмінал звадкаванага прыроднага газу (ТСПГ). Пра гэта заявіў амбасадар ЗША ў Літве Роберт Гілкрыст.
У снежні мінулага года прэзідэнт ЗША Дональд Трамп падпісаў абаронны бюджэт, які прадугледжваў санкцыі супраць кампаній, якія працуюць на будаўніцтве "Паўночнага патоку - 2». Швейцарская кампанія Allseas, якая ўдзельнічае ў пракладцы труб газаправода, заявіла аб прыпыненні работ. З прычыны гэтага завяршэнне тэрмінаў будаўніцтва было перанесена. Паводле слоў Уладзіміра Пуціна, чакаецца, што трубаправод запрацуе да канца гэтага года або пачатку наступнага.
tut.by