Мінскія падаткавікі ўзяліся за маршрутчыкаў. Прычым цікавяцца пытаннямі, якія не мусілі б іх хваляваць

Прэтэнзіі, якія мінскія падаткавікі прад'яўляюць кіроўцам і ўладальнікам маршрутак, могуць выклікаць здзіўленне.

_belarus_minsk_horad_veczar_2022_fota_dzmitryeu_dzmitryj_novy_czas__11__logo.jpg

Мінскія падаткавікі ўзяліся за праверку працы маршрутных таксі. Адна з прэтэнзій — прыём наяўных грошай з парушэннямі. Гэта вынікае з паведамлення ўпраўлення аператыўных мерапрыемстваў інспекцыі Міністэрства па падатках і зборах па Мінску, піша «Люстэрка».

Падаткавікі таксама звяртаюць увагу на тое, што маршрутчыкі часцяком ездзяць на «свежых і адносна нятанных мікрааўтобусах такіх марак, як "Мерсэдэс", "Фольксваген"».

Ва ўпраўленні распавялі, што 6 сакавіка знайшлі трох кіроўцаў нерэгулярных перавозчыкаў, якія з парушэннямі паказвалі наяўную выручку. На іх склалі пратаколы аб адміністрацыйных правапарушэннях.

«Усіх іх аб'ядноўвае адна інфармацыйная платформа з гучнай назвай "Атлас", якая амаль бескарысліва забяспечвае сферу нерэгулярных перавозак пастаянным прытокам пасажыраў. У бліжэйшы час наша кіраванне больш уважліва вывучыць тое, як гэтая платформа арганізавала свае дагаворныя адносіны са сферай нерэгулярных перавозчыкаў», — паведамляе ўпраўленне.


Якія яшчэ пытанні ў падатковай узнікаюць да маршрутчыкаў?

Мінскія падаткавікі таксама звяртаюць увагу на тое, што «практычна 100% нерэгулярных перавозак ажыццяўляецца на "свежых" і адносна нятанных мікрааўтобусах такіх марак як "Мерсэдэс", "Фальксваген"». Ва ўпраўленні не ўдакладняюць, чаму ў іх выклікае пытанні абнаўленне аўтапарка.

«Пры гэтым фірма, якая ажыццяўляе перавозку пасажыраў, не з'яўляецца ўласнікам мікрааўтобуса, якім кіруе кіроўца, які заключыў з фірмай дагавор падраду. Гэта яшчэ ў лепшым выпадку. Увага, рытарычнае пытанне: у гэтых рэаліях, хто і якія гарантыі здольны даць пасажыру ў нерэгулярных перавозках?» — адзначаюць ва ўпраўленні аператыўных мерапрыемстваў інспекцыі МПЗ Менску.

Пры гэтым падаткавікі не тлумачаць, чаму, на іх думку, якія пытанні па гарантыі для пасажыраў і з якой нагоды могуць узнікнуць.

Таксама мінская падатковая звяртае ўвагу на тое, што ўладальнікам аднаго з маршрутнага «Мерсэдэса» значыцца жанчына 1958 года нараджэння.

«Мяркуючы па ўзросце, даўно на пенсіі. Ужо цікава? Акрамя гэтага, паводле даных Дзяржаўтаінспекцыі, гэтая грамадзянка і за рулём ніколі не сядзела, паколькі звесткі аб вадзіцельскім пасведчанні ў інфармацыйнай базе ДАІ адсутнічаюць, — адзначаюць ва ўпраўленні. — Ну, дапусцім, набыла грамадзянка мікрааўтобус і бязвыплатна перадала ў арэнду юрыдычнай асобе. Так-так, бязвыплатна і ніяк інакш! А хто ж ім кіруе? А вось і кіроўца: грамадзянін Н., які нідзе не працуе з лютага 2023 года, 1971 года нараджэння».

Падаткавікі не тлумачаць, чаму ў іх выклікаў такую цікавасць уладальнік аўтамабіля, а таксама кіроўца, які на ім ездзіць.