Цяпер грашовы перавод палітвязням змогуць адпраўляць толькі сваякі

Згодна з абнаўленнямі ў Крымінальна-выканаўчым кодэксе (п. 4 арт. 85) , асуджаныя цяпер могуць атрымліваць грашовыя пераводы ад не сваякоў толькі з дазволу адміністрацыі выпраўленчай установы, паведамляе «Наша Ніва».

Важна разумець, што гэта тычыцца калоній: чалавеку, які знаходзіцца, напрыклад, у СІЗА да суда ці чакае абскарджвання, усё яшчэ могуць накіроўваць і бандэролі, і пераводы ўсе ахвотныя.

Дадзеныя змены набылі моц у чэрвені, але яшчэ да гэтага некалькі чалавек, што лістуюцца з палітвязнямі, паведамлялі, што асуджаных загадзя папярэдзілі: хутка ў вас забяруць «лішнія» грошы і падтрымку ад «чужых» людзей.

Адпраўленыя ўжо пасля ўступлення змен у сілу пераводы цяпер вяртаюцца людзям назад.

«Што рабіць?» — задаецца пытаннем «НН». Спрабаваць падтрымліваць палітвязняў, як і раней: усё ж прымуць перавод на «атаварку» ці не — вырашае адміністрацыя канкрэтнай установы. Калі пераводы ўсё ж вяртаюцца — выходзіць на сваякоў і блізкіх асуджанага і падтрымліваць вязняў праз іх.