«Дэпрэсія і страх». Шоумэн Дзмітрый Шэпелеў распавёў пра паездку ў Беларусь

Тэлевядучы Дзмітрый Шэпелеў у сацсетках распавёў аб нядаўняй паездцы ў Беларусь, выхадцам з якой ён з'яўляецца.

«Я правёў там усяго два дні. У дзень, калі я прыехаў, абвінавачаны ў пратэстных дзеяннях Сцяпан Латыпаў у зале суда перарэзаў сабе горла. «...калі я не прызнаю віну, будуць крымінальныя справы супраць родных і суседзяў», — сказаў ён перад тым, што здарылася, — цытуе Шэпелева «Салідарнасць». — Мінск быў для мяне як серыял «Сябры».

Там заставаліся мае блізкія сябры юнацтва. Самыя шчаслівыя гады жыцця я правёў з імі. І нават з'ехаўшы, я заўсёды ведаў — яны там. Варта толькі прыехаць. Цяпер не. Шасцёра ў эміграцыі. Вымушанай. З'ехаў, збег, схаваўся за мяжой ўвесь бліжэйшы круг маіх людзей. Серыял скончыўся.

У Мінску суіснуюць дзве рэальнасці. Першая рэальнасць — гэта людзі «пераменаў». Другая рэальнасць — гэта тыя, хто па розных прычынах маўчаць. Агульнае паміж гэтымі рэальнасцю толькі дэпрэсія і страх. Новае слова беларускага лексікону «бусафобія» — калі побач аказваецца несамавіты мікрааўтобус. Гэта ў іх запіхвалі і везлі ў невядомым кірунку дэманстрантаў, падазраваных, нязгодных.

— Памятаеш нашага агульнага сябра?

— Так

— Ён сядзіць. У другі раз.

— Гэта як?

— Адседзеў першыя 15, выпусцілі на два дні і зноў. Часам паўторна забіраюць прама каля брамы сіза.

— ...

У гэты момант мне вельмі складана справіцца з эмоцыямі, не паддацца паніцы, не схапіць сумку і гэтую ж хвіліну не раздумваючы памчацца падалей. «Мы балансуем паміж пачуццём страху і пачуццём нянавісці да сітуацыі», — кажа мая сяброўка».

Дзмітрый Шэпелеў пачынаў кар'еру вядучага на Беларускім тэлебачанні, затым шмат працаваў на тэлеканалах Украіны. Найбольш вядомы як вядучы расейскага «Першага канала».

З 2020 года працуе на тэлеканале ТНТ.