Фармацэўта, які зняў пратэст працоўных у Маладзечне, затрымалі ў той жа вечар

Работнікі маладзечанскага малочнага камбіната 11 мая выйшлі на прахадную са скаргамі на малыя заробкі. У сябе ў Інстаграме гэты сход асвятляў мясцовы фармацэўт Расціслаў Чапурны. Як стала вядома «Н...й Н...е», у той жа вечар Чапурнога схапілі сілавікі.

Расціслаў Чапурны

Расціслаў Чапурны


«Яго затрымалі ў той жа вечар, калі ён здымаў работнікаў малочнага камбіната. Як і дзе яго схапілі, я не ведаю. Але ў той жа вечар прыйшлі па яго жонку, сказалі: «Прайдзёмце». Яна пацікавілася, дзе Расціслаў, адказ быў: а Расціслаў ужо ў нас, — расказаў «НН» сябар блогера. — Пасля ў іх дома быў ператрус, забралі мабільнікі, камп’ютарную тэхніку».
Дакладна лёс блогера невядомы. Яго сябар кажа, што Чапурному ўжо прысудзілі 10 сутак. Таксама ёсць асцярога, што цяпер Расціслава могуць абвінаваціць у чымсьці больш сур’ёзным, па чутках, нават у тым, што ён сам арганізаваў тую «забастоўку».
«Ніякай палітыкай Расціслаў не займаўся, наадварот, стараўся ў гэтую сферу не лезці. Працаваў фармацэўтам, блогерства для яго больш як хобі.
Ён здымаў агляды на дастаўку, ролікі пра маладзечанскае жыццё. Вядома, часам яму пісалі нешта ў сацсеткі, прасілі асвятліць нейкія падзеі. Магчыма, так адбылося і з гэтым сходам работнікаў малочнага камбіната, — кажа сябар блогера. — Тое, што ён сам мог неяк арганізаваць гэтую забастоўку — гэта проста смешна, абсурд».


Улады заявілі, што заробкі на прадпрыемстве ўпалі да 200—300 рублёў выпадкова, у выніку камп'ютарнага збою.
Паводле раёнкі, «Маладзечанскай газеты», новая праграма пры налічэнні зарплаты дала збой. «Будзе праведзены пераразлік, і людзі атрымаюць тое, што ім належыць».
Выданне нібыта паразмаўляла з работнікамі прадпрыемства, якія выходзілі за прахадную. Ніякіх іх цытат і імён аўтар не прыводзіць, а піша наступнае: «Людзям сорамна. І іх можна зразумець. Яны сталі «лялькамі» ў руках умелага рэжысёра».
Па версіі раёнкі, з красавіка малочны камбінат увайшоў у сталічны холдынг як вытворчы ўчастак, якім кіруе Лідзія Стаўрова. 10 мая людзі атрымалі разліковыя лісты. Некаторыя работнікі былі здзіўленыя, што заробак у іх ніжэйшы, чым у мінулым месяцы.
Але блогеру Расціславу Чапурнову супрацоўнікі расказалі, што рэарганізацыя на прадпрыемстве адбылася ў лютым. І праблемы з заробкам пачаліся яшчэ тады, а не ўчора.
Раней на камбінаце атрымлівалі ў сярэднім каля тысячы рублёў. Цяпер работнікі атрымліваюць па 300—400, а штат скарацілі з 200 да 50 чалавек.
«Калі нас далучылі да Мінска ў лютым, сказалі, што заробкі меншымі не будуць. Хто вінаваты ў гэтай сітуацыі — ніхто не ведае. Мы атрымалі заробкі і не разумеем, як на іх жыць — гэта проста вельмі страшна», — расказвала супрацоўніца.