Генпракуратура спыніла крымінальную справу «Прэс-клуба». У афіцыйным паведамленні — ні слова пра памілаванне

Генеральная пракуратура спыніла вытворчасць па крымінальным удзеле ў дачыненні да супрацоўнікаў «Прэс-клуба» Юліі Слуцкай, Пятра Слуцкага, Алы Шарко і Сяргея Альшэўскага. Як афіцыйна паведамляе прэс-служба пракуратуры, справа спыненая на падставе ч. 2 арт. 30 КПК і арт. 88-1 КК («Вызваленне ад крымінальнай адказнасці ў сувязі з добраахвотным пакрыццём прычыненай шкоды»).

Слуцкая абвінавачвалася ва ўхіленні ад выплаты падаткаў у асабліва буйным памеры, Слуцкі, Шарко і Альшэўскі — у аказанні ёй дапамогі, піша REFORM.by.

Як паведамляе Генпракуратура, абвінавачаныя прызналі віну ў поўным аб'ёме, далі паказанні пра абставіны злачынства, пакрылі шкоду і заплацілі крымінальна-прававую кампенсацыю ў аналагічным памеры.

Як устанавіла следства, «Прэс-клуб» арандаваў памяшканні, якія знаходзіліся ў дзяржаўнай уласнасці, і выкарыстоўваў спрошчаную сістэму падаткаабкладання. «З чэрвеня 2016 года па снежань 2019 года ўстанова падавала названыя аб’екты нерухомасці ў аплатнае карыстанне іншым асобам, што абавязвала яго спыніць прымяненне льготных умоў і выплачваць падаткі ў агульным парадку», — гаворыцца ў паведамленні Генпракуратуры.

Паводле следства, Юлія Слуцкая давала ўказанні паказваць у бухгалтарскім ўліку непраўдзівыя звесткі аб аказанні паслуг па арганізацыі і правядзенні мерапрыемстваў для кліентаў. Пры дапамозе Слуцкага, Шарко і Альшэўскага яна атрымала даход, схаваўшы абставіны яго атрымання ад падатковых органаў, і працягнула ўжываць спрошчаную сістэму падаткаабкладання. Сума нявыплачаных падаткаў ацэньваецца ў 110 тысяч рублёў.

Заснавальніца «Прэс-клуба» Юлія Слуцкая, праграмная дырэктарка Ала Шарко, дырэктар Сяргей Альшэўскі і аператар Пётр Слуцкі былі затрыманыя 22 снежня 2020 года. Іх вызвалілі з-пад варты 19 жніўня. Як паведамлялася, да іх было ўжытае памілаванне. Пазней вызвалілі яшчэ аднаго фігуранта справы — Дзяніса Сакалоўскага. За кратамі застаецца Ксенія Луцкіна, якая таксама праходзіла па справе «Прэс-клуба», але ёй было прад’яўлена іншае абвінавачанне. Дэталі новай крымінальнай справы пакуль невядомыя — адвакат пад падпіскай аб неразгалошванні.

Усе фігуранты справы «Прэс-клуба» былі прызнаныя праваабаронцамі палітвязнямі.