Крэмль: Пасля вучэнняў расійскія войскі пакінуць Беларусь

Прэс-сакратар прэзідэнта Расіі заявіў, што пасля вучэнняў у Беларусі расійскія войскі вернуцца ў месцы сваёй пастаяннай дыслакацыі. Дзмітрый Пяскоў сказаў, што ніколі не ішло гаворкі аб тым, што яны могуць застацца ў Беларусі.

7 лютага ў Маскве прайшлі перагаворы Эмануэля Макрона і Уладзіміра Пуціна.

Гісторык Аляксандр Фрыдман, вывучыўшы заходнюю прэсу, адзначае:

— Адміністрацыя Макрона сцвярджае, што французскі прэзідэнт дамогся ад Пуціна абяцання, што расійскія войскі пакінуць Беларусь пасля заканчэння лютаўскіх вучэнняў. Варта адзначыць, што абяцанне Пуціна — гэта зусім не тое, на што варта спадзявацца. Гэта ведае і сам Макрон. Навіна, якая разляцелася па ўсім свеце, запушчаная Парыжам з відавочнай мэтай: прадэманстраваць, што на перамовах у Маскве былі дасягнутыя хоць нейкія вынікі.

Але ж Дзмітрый Пяскоў услед за Макронам фактычна анансаваў вывад расійскіх войск з Беларусі пасля вучэнняў.

Нагадаем, вучэнні «Саюзная рашучасць» павінны прайсці 10-20 лютага.

Паводле «Салідарнасці».