Міжнародны Чырвоны Крыж «сур'ёзна занепакоены» дзеяннямі беларускага кіраўніка арганізацыі Дзмітрыя Шаўцова

Міжнародны Чырвоны Крыж адмежаваўся ад беларускага кіраўніка Дзмітрыя Шаўцова, які прызнаў, што дэпартуе дзяцей з Украіны — на аздараўленне

Міжнародная федэрацыя таварыстваў Чырвонага Крыжа і Чырвонага Паўмесяца (МФКК) выступіла з афіцыйнай заявай у сувязі з выказваннямі і дзеяннямі кіраўніка Беларускага таварыства Чырвонага Крыжа (БТЧК) Дзмітрыя Шаўцова падчас паездкі ў Данецк і Луганск.

Арганізацыя заявіла, што не давала згоды на выкарыстанне свайго імя і сваіх сімвалаў падчас акцыі кіраўніка Беларускага таварыства Чырвонага Крыжа (БТЧК) Дзмітрыя Шаўцова на тэрыторыі ваеннага канфлікту.

«Надзвычайныя абставіны гэтага візіту, у тым ліку выкарыстанне сімвала, звязанага з адным з бакоў міжнароднага ўзброенага канфлікту ва Украіне, закранаюць асноўныя прынцыпы міжнароднага руху Чырвонага Крыжа і Чырвонага Паўмесяца. Візіт і звязаныя з ім мерапрыемствы не былі ўзгодненыя з іншымі чалцамі руху, як таго патрабуюць нашы ўнутраныя правілы і палажэнні», – гаворыцца ў заяве.

Федэрацыя МФКК заявіла, што сур'ёзна ўспрымае дзеянні любога з нацыянальных таварыстваў Чырвонага Крыжа, якія супярэчаць гуманітарнай місіі, прынцыпам і палітыцы Чырвонага Крыжа, таму перадала справу ў Камітэт па захаванні і пасярэдніцтве – незалежны орган, які расследуе парушэнні добрасумленнасці.

Міжнародная арганізацыя паведаміла, што звязалася з беларускім Чырвоным Крыжам, каб выказаць «сур'ёзную занепакоенасць і спыніць любую падобную дзейнасць у будучыні».

У паведамленні падкрэсліваецца, што ўсе нацыянальныя таварыствы Чырвонага Крыжа абавязваюцца выконваць агульныя ўнутраныя правілы і палітыку.

Нагадаем, паней Дзмітрый Шаўцоў падчас паездкі на акупаваную тэрыторыю Данецкай вобласці заявіў прапагандыстам, што беларускі Чырвоны Крыж працягне “прымаць актыўны ўдзел» у вывазе дзяцей з Украіны. На Беларускім дзяржаўным тэлебачанні нават быў выпушчаны рэпартаж з некалькіх гарадоў Данбаса на тэму вывазу дзяцей у Беларусь. У сюжэце выступіў Дзмітрый Шаўцоў у майцы і кепцы з лагатыпамі Чырвонага Крыжа, заявіўшы, што «беларускі Чырвоны Крыж прымаў у гэтым — і прымае, і будзе прымаць — актыўны ўдзел».

У рэпартажы канала "Беларусь 1", у якім прагучала заява Шаўцова, таксама гучалі абвінавачванні на адрас Украіны ў тым, што яна "бамбіць Данбас". Карэспандэнтка задавала пытанні ўкраінскім дзецям, якія былі вывезеныя з акупаваных Расіяй тэрыторый. Адзін хлопчык прызнаўся, што хоча ў будучыні стаць вайскоўцам і абараняць "Радзіму" – прычым мелася на ўвазе Расія. Пра такую ж мару распавёў і яго аднагодак з Марыупаля, які таксама пабываў у Беларусі.

Міністр замежных спраў Украіны Дзмітрый Кулеба заклікаў Міжнародны крымінальны суд выдаць ордэр на арышт Шаўцова.

Паводле thinktanks.by, www.currenttime.tv