«Назваўся польскім нацыстам». У Варшаве збілі таксіста з Беларусі

Віталь (імя зменена па просьбе героя) эміграваў з Беларусі ў Польшчу ў верасні 2022 года. Маладому чалавеку 23, ён жыве ў Варшаве і працуе таксістам. 3 ліпеня на яго і іншых беларускіх і ўкраінскіх таксістаў напала банда палякаў, якая арудуе на вакзале Warszawa Gdańska. Скончылася збіццём, абразамі на нацыянальнай глебе і паліцыяй. Падрабязнасцямі таго, што адбылося, беларус падзяліўся з выданнем «MOST».

У сярэдзіне таго дня Віталь прыехаў на спецыялізаваную стаянку для таксістаў каля вакзала Warszawa Gdańska. Дарэчы, спыняцца там могуць толькі пазначаныя таксі, кіроўцы якіх маюць ліцэнзію. Але ў рэальнасці сітуацыя іншая: са слоў Віталя, там варочае справамі мясцовая мафія «ў выглядзе браткоў з 90-х». Яны бяруць пасажыраў «ад борта» і не даюць паркавацца нікому, акрамя сваіх, хоць месца прызначана менавіта для «афіцыялаў».

— Я знаходжуся ў чаце з іншымі ўкраінскімі і беларускімі таксістамі. Адзін з іх скінуў відэа, дзе польскі таксіст (з тых, якія стаяць там і «кантралююць» месца) накідваецца на яго з абразамі на нацыянальнай глебе і крычыць, што гэта месца толькі для палякаў, спрабуючы выхапіць з рук тэлефон. Мы выйшлі на месца. Калі я прыехаў, той самы паляк падышоў да мяне і пачаў абражаць. Крычаў, што з'яўляецца польскім нацыстам і ненавідзіць беларусаў і ўкраінцаў. Усяго нас сабралася 8-9 чалавек — усе працуюць у Uber або Bolt, маюць ліцэнзію, а машыны абляпляюцца адпаведнымі пазначэннямі. У выніку мы ад'ехалі на суседнюю стаянку.

На гэтым гісторыя не скончылася: неўзабаве да хлопцаў, што стаялі воддаль, падышлі таксама 8-9 польскіх таксістаў і пад'ехаў чорны Mercedes.

— З машыны выйшаў той самы «нацыст» з тэлескапічнай дубінкай у адной руцэ і пярцовым балончыкам у другой. Ён накінуўся на мяне і пачаў наносіць удары дубінкай з крыкамі: «Wyp***dalaj stąd!» («Валі адсюль!»). У выніку ў мяне гематома на руцэ і разбіты тэлефон.

Пасля інцыдэнту Віталь зняў пабоі і напісаў заяву ў паліцыю.

Што рабіць замежніку, калі збілі ў Польшчы

У Цэнтры падтрымкі замежнікаў у Беластоку фонда «Акно на Усход» распавялі, што рабіць беларусам, калі іх збілі або абразілі ў Польшчы.

— Чалавек павінен патэлефанаваць у паліцыю. Калі супрацоўнікі адмаўляюцца прыязджаць, ён можа звязацца з любой праваабарончай арганізацыяй або арганізацыяй, якая займаецца замежнікамі ў Польшчы. Далей арганізацыя будзе звяртацца ў паліцыю.

Калі паліцыя не прыехала, то чалавек на наступны дзень павінен падаць ужо самастойна заяву ў пастарунак. Падрабязна апісаць, дзе быў інцыдэнт, колькі людзей, апісаць, ці былі там камеры і ўсе іншыя важныя моманты. Пажадана, каб былі сведкі. Са справай нельга зацягваць. Калі ёсць пабоі, то варта прайсці агляд. Важна ўсё зафіксаваць.