Пасля крытыкі Лукашэнкі замест «МакДональдса» можа з'явіцца беларускі фастфуд. Расійскага не будзе
У панядзелак, 21 лістапада, афіцыйна быў апошні дзень, калі ў Беларусі працаваў «МакДональдс», але раніцай аўторка выявілася, што нічога не змянілася. За некалькі дзён да гэтага Лукашэнка раскрытыкаваў замену амерыканскай франшызы расійскай, што і магло стаць прычынай адмены прыходу расійскай сеткі «Вкусно — и точка», распавяла «Л*стэрку» крыніца, знаёмая з унутранымі працэсамі ў кампаніі.
Праўда, канчатковага рашэння аб тым, застанецца «МакДональдс» або яго заменіць беларускі фастфуд, пакуль няма.
— Выступленне Лукашэнкі з нагоды закрыцця «МакДональдса» —
асноўная прычына адмененага рэбрэндынгу, — распавядае суразмоўца. — Рэстараны
павінны былі зачыніцца 21 лістапада а 18.00, але а 17.50 кіраўніцтва
паведаміла: пакуль працягваем працаваць. Як мне вядома, за некалькі дзён да
гэтага дырэктар кампаніі сустракалася з высокапастаўленым чыноўнікам. І пытанне
стаяла так: нам не трэба ні амерыканскага, ні расійскага, нам трэба сваё.
Гэта інфармацыя была ў мужчыны яшчэ некалькі дзён таму.
Аднак, як ён сцвярджае, сёння сітуацыя ўсё яшчэ нявызначаная: незразумела,
застанецца «МакДональдс» або будзе новы беларускі фастфуд.
— Цяпер кампанія па-ранейшаму працуе ў падвешаным стане і ад кіраўніцтва няма ніякай канкрэтыкі, — кажа ён. — Калі дакладна будзе прынята рашэнне, невядома. Я думаю, гэта пытанне не аднаго тыдня. Каб стварыць нешта сваё, наладзіць маркетынг, пастаўкі, рэцэптуру і тэхнічныя працэсы, патрэбен час. Яшчэ 2-3 тыдні рэстараны будуць працаваць у такім жа падвешаным рэжыме.
