У Беларусі завялі крымінальную справу на ўкраінскага дэпутата Аляксея Ганчарэнку за допіс пра Лукашэнку

Генпракуратура Беларусі распачала крымінальныя справы ў дачыненні да дэпутата Вярхоўнай Рады Украіны Аляксея Ганчарэнкі.

Яму закідваюць пагрозу гвалтам у дачыненні да Лукашэнкі і дыскрэдытацыю Беларусі.

Учора дэпутат адказаў на віншаванне Лукашэнкі з Днём Незалежнасці Украіны, што «ў наступны Дзень Незалежнасці Украіны Лукашэнка будзе вісець на слупе, а беларускі народ будзе вольны і будзе жыць у дэмакратычнай дзяржаве!».

Даведаўшыся пра крымінальную справу ў Беларусі, Аляксей Ганчарэнка адказаў: «Мне інкрымінаваныя пагроза гвалтам да «прэзідэнта» Беларусі і дыскрэдытацыя Рэспублікі Беларусь. Адно пытанне, а як я пагражаў гвалтам Святлане Ціханоўскай? Я пагражаў вашаму клоўну Лукашэнку, які незаконна захапіў уладу і якому вы дапамагаеце заняволіць мой любімы беларускі народ. Жыве Беларусь!»

Нагадаем, што ўчора Лукашэнка накіраваў віншаванні ўкраінскаму народу і пажадаў яму мірнага неба. Праз некалькі гадзін з тэрыторыі Беларусі працягнуліся ракетныя ўдары па Украіне.