Жанчыны, якіх затрымалі ў саўне Жодзіна, атрымалі штрафы на агульную суму 45 820 рублёў

6 і 7 мая ў Жодзінскім гарадскім судзе прайшлі пасяджэнні па адміністрацыйных справах у дачыненні да 12 жыхарак Жодзіна, якіх 24 красавіка затрымалі ў прыватнай лазні.

Сярод жанчын, у асноўным, педагогі і медыцынскія работнікі, некаторыя з іх шматдзетныя мамы, ёсць маці-гераіня, маці дзіцяці з інваліднасцю. Ніхто з іх не прызнаў сваю віну. Пры гэтым кожная з іх патлумачыла, што ў лазні не было ніякага сходу, ніхто з іх не быў на гэтай сустрэчы з забароненай сімволікай, распавядае ex-press.by.

На думку абвінавачаных, відэазапісы з камер, якія здымалі тое, што адбываецца, міліцыянты і з рэгістратараў, якімі яны абсталяваны, даказалі б невінаватасць ўсіх. Але хадайніцтвы аб праглядзе відэа не былі задаволеныя, бо ў адказ на запыт суда начальнік Жодзінскага ГАУС Уладзімір Трацюк паведаміў, што камеры тэхнічна няспраўныя і запісаў таго, што адбывалася ў саўне няма.

У судзе выступілі сведкі — вайсковец Ганакоў і міліцыянты Чыжанкоў і Мусік. Яны растлумачылі, што калі ўсіх вывелі з сауны, супрацоўнікі выявілі там чыйсьці заплечнік, у якім быў адзін сцяг. Ні ў каго з прысутных у руках сведкі сцягоў не бачылі. Каму належаў заплечнік, невядома.

Суддзі Іван Грынкевіч, Ганна Мукавозчык і Кацярына Якубіцкая вынеслі рашэнні пакараць жанчын штрафамі:

Вольга Альшэўская атрымала 100 базавых велічынь (2900 рублёў),

Наталля Локіць — 100 базавых велічынь,

Вольга Аляксеева — 200 базавых велічынь,

Наталля Бяляцкая — 200 базавых велічынь,

Святлана Шабуня — 100 базавых велічынь,

Вера Такарчук — 100 базавых велічынь,

Алёна Гайдук — 100 базавых велічынь,

Наталля Котава — 80 базавых велічынь,

Іна Чыжонак — 200 базавых велічынь,

Наталля Сацукевіч — 100 базавых велічынь,

Вікторыя Кажура — 100 базавых велічынь,

Людміла Анісімава — 200 базавых велічынь.

Усяго: 1 580 базавых велічынь або 45 820 рублёў.

Нагадаем, 24 красавіка ў горадзе адсутнічала і гарачая, і халодная вада з-за запланаванага прамывання вадаправода. Але памыцца ў сауне жанчынам не ўдалося. За імі прыехалі 4 бусы з АМАПам і міліцыяй.

Усіх затрыманых даставілі ў Жодзінскі ГАУС. Тут ім паведамілі, што ў міліцыю паступіў сігнал аб тым, што яны ўжываюць наркотыкі. Праз некаторы час прычыну затрымання змянілі і склалі пратаколы аб удзеле ў незаконным масавым мерапрыемстве.

У ІЧУ пакінулі 9 чалавек, якіх асудзілі праз тры дні — яны атрымалі па 15 і па 25 сутак арышту.