«Дзіця цяпер з бабуляй і дзядулем». Затрымалі Дар'ю Лосік, жонку палітвязня Ігара Лосіка (абноўлена)

Затрымана жонка палітвязня Ігара Лосіка Дар'я Лосік. Абставіны затрымання пакуль невядомыя. У сям'і ёсць маленькае дзіця.

У адным з праўладных каналаў апублікаваны пост, дзе ўказваецца, што на Дар'ю можа быць заведзена крымінальная справа паводле арт. 361-4 Крымінальнага кодэкса («Садзейнічанне экстрэмісцкай дзейнасці») за інтэрв'ю «экстрэмісцкаму» тэлеканалу «Б*лсат».

UPD. Як стала вядома «С*абодзе», з ператрусам да Дар‘і Лосік прыйшлі а палове на восьмую ранку. Сама Дар‘я з дачкой яшчэ спала.

Дар‘і далі патэлефанаваць бацькам, маці дзяўчыны хутка прыехала на месца, але яе нават не пусцілі ў кватэру, толькі потым аддалі паперку аб тым, што быў праведзены ператрус.

Падчас ператрусу ў кватэры, апроч сілавікоў і панятых, былі толькі сама Дар‘я і яе дачка Паўліна.

«Затрыманая на трое сутак у рамках крымінальнай справы, цяпер яе павезлі ў Берасце», — сказалі крыніцы.

Па якім канкрэтна артыкуле яе абвінавачваюць, пакуль невядома.

Увечары бацькі затрыманай плануюць сустрэцца з адвакатам, каб даведацца больш падрабязнасцей справы.

«Паўліна пакуль што ў бабулі з дзядулем, бацькоў Дар’і», — сказалі суразмоўцы выдання.

Крымінальны пераслед за інтэрв'ю «няправільным» медыя — адносна новая з'ява ў практыках лукашэнкаўскай рэпрэсіўнай машыны. Вядома, што за размову ў эфіры «Е*рарадыё» затрымалі паводле крымінальнага артыкула ваеннага аналітыка Ягора Лебядка.

Дар'я Лосік прапанавала «грамадзяніну Лукашэнку» абмяняць мужа на сябе

Разам з тым за рэдкія каментары «экстрэмісцкім» СМІ не чапаюць тых, хто на баку рэжыму Лукашэнкі. Так, нядаўна «Н*шай Ніве» пра амністыю распавядала экс-кандыдатка ў прэзідэнты Ганна Канапацкая. Наўрад ці з гэтай нагоды да яе ўзнікнуць пытанні з боку сілавікоў.

Яшчэ ў ліпені сілавікі канфіскавалі маёмасць палітзняволенага Ігара Лосіка і яго жонкі Дар'і. Сярод таго, што падпала пад канфіскацыю, былі нават чайнік і піяніна. Паведамлялася, што Дар'я Лосік зможа выкупіць арыштаванае сама, але для гэтага Ігар мусіць атрымаць дазвол ад органаў прымусовага выканання.

Ваеннага аналітыка не выпусцілі пасля «сутак» і завялі крымінальную справу

Ігар Лосік быў асуджаны па «справе Ціханоўскага» да 15 гадоў пазбаўлення волі, яго абвінавацілі ў «распальванні сацыяльнай варожасці» ў дачыненні да прадстаўнікоў улады і праваахоўных органаў, а таксама ў «арганізацыі масавых беспарадкаў». З моманту ўзяцця пад варту Ігар Лосік двойчы аб'яўляў галадоўку, першую з якіх трымаў 42 дні.