«Экстрэмісцкі» зварот святароў, продаж кватэры праваабаронцы і новыя затрыманні за КР. Хронікі рэпрэсій 15 траўня
У Беларусі працягваюць пашыраць «экстрэмісцкія» спісы і пераследаваць удзельнікаў пратэстаў, журналістаў, праваабаронцаў і вернікаў. Суд прызнаў «экстрэмісцкім» зварот святароў 2020 года, улады выставілі на продаж кватэру Уладзіміра Хільмановіча, а прапаганда паказала ўжо трэцяга чалавека, нібыта затрыманага за галасаванне ў Каардынацыйную раду.
У Беларусі прызналі «экстрэмісцкім» зварот святароў да вернікаў падчас пратэстаў
Суд Цэнтральнага раёна Мінска прызнаў «экстрэмісцкім» «Зварот да хрысціян Беларусі», апублікаваны восенню 2020 года на сайце Pravmir.
Таксама ў «экстрэмісцкі спіс» дадалі старонкі ініцыятывы «СПЕЦПАДРАЗДЗЯЛЕННЕ 1514», Facebook-акаўнты «Alaksandar Arsionaŭ», «Юлiя Юхно», «Мова Нанова – Тэлеверсiя», «Наталья Горячко Басалыга», Threads-старонкі «chinchinchannelofficial», «Mikalai Bandarenka», «kyky_org», а таксама YouTube-відэа «Почему Уехал из Беларуси? Когда Вернусь Обратно?».
Улады выставілі на продаж арыштаваную кватэру журналіста і праваабаронцы Уладзіміра Хільмановіча
Аўкцыён павінен адбыцца 26 траўня. Двухпакаёвую кватэру плошчай 50 квадратных метраў ацанілі ў 126 тысяч рублёў, паведамляе «Гарадзенская Праваабарона».
Раней улады ўжо спрабавалі прадаць канфіскаванае лецішча Хільмановіча ў Мастоўскім раёне, а таксама канфіскавалі і прадалі бытавую тэхніку ягонай сям’і — лядоўню, пральную машыну і тэлевізар.
19 жніўня 2024 года Гродзенскі абласны суд завочна прысудзіў Хільмановічу пяць гадоў калоніі ўзмоцненага рэжыму і штраф у 40 тысяч рублёў.
Былы супрацоўнік службы аховы Лукашэнкі асуджаны па палітычнай справе
50-гадовага Андрэя Спасава асудзілі за «садзейнічанне экстрэмісцкай дзейнасці», піша @nashaniva.
Дакладны прысуд невядомы, але ў «спісе экстрэмістаў» пазначана, што мужчына ўжо «адбывае пакаранне».
У «спіс экстрэмістаў» дадалі яшчэ 17 чалавек
15 траўня МУС абнавіла «Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».
Цяпер у ім 6620 чалавек.
Сярод новых імёнаў — журналістка Ціна Палынская і яе дачка Маргарыта Рабіновіч.
Прапаганда паказала трэцяга чалавека, нібыта затрыманага за галасаванне ў Каардынацыйную раду
Як піша «Наша Ніва», гаворка ідзе пра гродзенца Паўла Карлюкова.
Мужчына шмат гадоў жыў у ЗША, працаваў афіцыянтам на круізных лайнерах, у гатэлях, аўтасалонах і кавярнях у розных штатах. Апошнім часам ён працаваў выкладчыкам англійскай мовы на фрылансе, у тым ліку ў анлайн-школе Skyeng.
Што цяпер адбываецца з Карлюковым — невядома.
Раней сілавікі пагражалі крымінальнымі справамі як тым, хто балатуецца ў Каардынацыйную раду, так і тым, хто ўдзельнічае ў галасаванні.
Няма таксама пацверджання, што Карлюкоў сапраўды галасаваў.
Беларуску Карыну Зданевіч-Спыхальскую затрымалі ў Італіі па запыце Мінска
1 лютага Карыну Зданевіч-Спыхальскую затрымалі ў аэрапорце Орыа-аль-Серыа ў Бергама падчас пашпартнага кантролю, паведамляе Reform са спасылкай на італьянскія медыя.
У Беларусі жанчыну абвінавачваюць у нібыта наўмысным давядзенні да банкруцтва ў 2017–2018 гадах. Сама яна называе справу сфабрыкаванай і звязвае пераслед са сваёй грамадзянскай пазіцыяй.
Пасля выбараў 2020 года Зданевіч-Спыхальская ўдзельнічала ў акцыях падтрымкі Святланы Ціханоўскай каля беларускай амбасады ў Варшаве.
Італьянская пракуратура выступіла супраць экстрадыцыі, адзначыўшы рызыку палітычнага пераследу ў Беларусі. На гэта ж звярнула ўвагу польскае консульства, бо жанчына мае і польскае грамадзянства.
Разгляд справы працягнецца ў чэрвені ў апеляцыйным судзе Брэшыа.
У Беларусі ліквідавалі каля 80 пратэстанцкіх суполак
Падчас візіту амерыканскага прапаведніка Франкліна Грэма ў Мінск Аляксандр Лукашэнка агучыў новыя лічбы пра пратэстанцкія суполкі ў Беларусі.
Паводле яго слоў, цяпер у краіне дзейнічаюць 850 пратэстанцкіх суполак, 20 місій і 5 навучальных устаноў.
Як адзначае «Хрысціянская візія», да перарэгістрацыі ў Беларусі было 931 пратэстанцкая суполка і 21 місія. Гэта азначае, што пасля кампаніі перарэгістрацыі былі ліквідаваныя каля 80 суполак і адна місія.