Спецслужбы Польшчы: Лукашэнка спрабуе выкарыстаць сітуацыю для змякчэння пазіцыі польскага ўрада
Улады Беларусі нібыта падаюць сігналы аб адкрытасці да дыялогу з Польшчай для таго, каб «адбяліць» свой імідж у вачах палякаў, але пры гэтым працягваюць аперацыі супраць Польшчы. Пра гэта заявіў упаўнаважаны ўрада Польшчы па бяспецы інфармацыйнай прасторы Станіслаў Жарын.
Фота з top-fon.com
«Расія і Беларусь працягваюць аперацыі супраць Польшчы, накіраваныя на разбурэнне іміджу Польшчы, падрыў узаемнага даверу паміж палякамі і ўкраінцамі, высмейванне структур бяспекі Польшчы і сеянне трывогі ў нашым грамадстве», — заявіў ён.
Па словах Жарына, у апошні час крамлёўская прапаганда працягвае аперацыю па дыскрэдытацыі польскай абараназдольнасці, прасоўваючы тэзіс, што ваенны патэнцыял польскіх узброеных сіл перабольшаны.
«У той жа час рашэнне польскага Міністэрства абароны аб стварэнні танкавага батальёна на ўсходзе краіны было «інтэрпрэтавана» крамлёўскай прапагандай — у тым ліку і Дзмітрыем Пясковым (прэс-сакратаром Пуціна — Рэд.) як крок да эскалацыі напружанасці ў стасунках з Мінскам і Масквой», — заявіў ён.
Жарын адзначыў, што ў адпаведнасці з аперацыямі, накіраванымі на сварку палякаў і ўкраінцаў шляхам агалоскі падзей (рэальных або выдуманых), здольных аслабіць узаемны давер паміж двума народамі, якія праводзіліся раней, прапаганда Расіі цяпер акцэнтуе ўвагу на пратэсце польскіх перавозчыкаў на мяжы з Украінай.
«У прапагандысцкай дзейнасці рэжыму Лукашэнкі ў дачыненні да Польшчы прасочваецца наступная тэндэнцыя: падаюцца сігналы аб адкрытасці Мінска да дыялогу з будучым урадам Польшчы, пры гэтым забываецца зло, нібыта здзейсненае польскім бокам да гэтага часу», — заявіў ён.
Прадстаўнік урада Польшчы дадаў, што ў той жа час рэжым Лукашэнкі паслядоўна падае цяперашнюю палітыку Варшавы як агрэсіўную, правакацыйную і шкодную для Польшчы і Еўропы.
«Падобныя наратывы беларускага рэжыму варта ўспрымаць як спробу выкарыстаць поствыбарчую сітуацыю ў Польшчы для змякчэння пазіцыі польскага ўрада ў дачыненні да варожых дзеянняў Мінска, а таксама для адбельвання свайго іміджу, поўнага фальшу», — заявіў ён.
Жарын дадаў, што аперацыя па дэстабілізацыі польска-беларускай мяжы з выкарыстаннем штучнай міграцыі, распачатая рэжымам Лукашэнкі летам 2021 года і кантраляваная беларускімі службамі, працягваецца.
«Гэтая аперацыя таксама пастаянна суправаджаецца дэзынфармацыйнай дзейнасцю, што заключаецца ў пастаянным паўтарэнні абвінавачванняў у адрас Польшчы ў здзяйсненні — рукамі памежных службаў — генацыду ў дачыненні да «бежанцаў», якія перасякаюць або спрабуюць перасекчы памежны бар'ер», — падкрэсліў ён.
Паводле РБК-Украіна