«Ну як, Арына, ты тут не пры чым?» Галоўны рэдактар «Тр*буны» Гаруновіч — пра тое, як Сабаленка падтрымлівала рэжым
Прэтэндэнтка на першую ракетку свету ў вялікім тэнісе Арына Сабаленка засвяцілася ў шэрагу скандалаў, звязаных з нежаданнем тэнісісткі асуджаць вайну і рэпрэсіі. Галоўны рэдактар спартыўнага выдання "Тр*буна" Алег Гаруновіч пракаментаваў сітуацыю вакол беларускі.
Арына Сабаленка на прэс-канферэнцыі. Фота: sport.ru
«Даўно сачыў за панылым спектаклем, які давала Арына Сабаленка, гастралюючы з турніру на турнір. Заходнім журналістам глыбока напляваць на Беларусь, на тое, што ў нас адбываецца. Пратэсты 2020 года ў іх свядомасці калі і засталіся, то нейкім пацьмянелым фрагментам, на які наклаліся падзеі наступных гадоў. Хто там пратэставаў, што такога нарабіў Лукашэнка — ужо і не ўспомніцца. Ці то дыктатар, ці то прэзідэнт, ці то дыктатар-прэзідэнт. Надакучыла і, па вялікім рахунку, не так важна для прасунутага чалавецтва.
Гэта і ратавала пасрэдную акторку. У Сабаленка не раз пыталіся пра вайну. І калі першыя пару месяцаў яна яшчэ крыху блыталася ў адказах (напрыклад, магла паабяцаць падтрымаць Украіну — і, канешне, у выніку падмануць), то з часам яна выпрацавала ідэальны маналог — абцякальны і апрычоны. У вольным выкладанні гучыць так: ну, ні адзін нармальны чалавек не падтрымлівае вайну, але гэта не мая віна, я не магу ні на што паўплываць, а спорт па-за палітыкай, дзякуй за ўвагу. Паўтараць гэта ёй было нескладана і прыемна. Зброя здавалася безадмоўнай і часта выкарыстоўвалася на прэс-канферэнцыях.
Але ж гэты маналог мог зрабіць уражанне толькі на тых, хто не ў тэме. А амаль усе заходнія журналісты, якія асвятляюць тэніс, не ў тэме (ды што там — у Макрона і Лукашэнка ўступае ў NATO). І таму гэты вадэвіль усіх задавальняў, а мяне крыху падкідвала. Ну як, Арына, ты тут не пры чым? Канечне, не выпадае казаць пра нейкую вызначальную ролю, пра глабальную віну, пра тое, што з Сабаленка ўсё пачалося, але каб увогуле ні пры чым, — ну гэта ж перабор.
Калі беларусаў збівалі пасля выбараў, кідалі ў турмы, Сабаленка з уласнай ахвоты падпісала ліст у падтрымку Лукашэнкі, а каб і далей заставацца па-за палітыкай, яна тусіла з ім на навагодняй віншаванцы 2020/2021, калі рэпрэсіі ішлі напоўніцу, а з моманту апошніх маршаў не мінула і месяца. І вось Лукашэнка, якога яна так падтрымлівала, уцягнуў Беларусь у вайну, а яна, Сабаленка, кажа ў Еўропах і Амерыках, што не мае дачынення да гэтага, і там гэта бясспрэчна прымалі. Ні пры чым — ну і добра тады. А дастаткова было толькі запытаць: ну ок, ты, канечне, па-за палітыкай, але ж ты падпісвалася ў падтрымку Лукашэнкі, святкавала з ім Новы год падчас рэпрэсій. Лукашэнка ўцягнуў у Беларусь у вайну. Можа, ты адчуваеш такую-сякую адказнасць за свае ранейшыя дзеянні?
Адшукалася смелая дзяўчына, якая не збаялася пра гэта запытацца ў лоб. З націскам, якога мы і чакаем ад сапраўдных украінцаў, супрацоўніца ўкраінскай "Тр*буны" Даша Мешчаракова ўдакладніла тое, што даўно было варта ўдакладніць пасля маналогу "А я тут пры чым?!". І калі Арыне патлумачылі, пры чым, у яе пачаліся ментальныя хваляванні і ўвогуле ўзнікла пачуццё небяспекі. І гэта прывяло да паўзакрытай прэс-канферэнцыі, куды адбіралі правільных журналістаў, каб спакою (ці за што яна там хвалявалася?) Сабаленка нішто не пагражала.
Акрамя абурэння і імпэту ўкраінка Даша мае 160 сантыметраў росту і дзесьці 56 кілаграмаў вагі. Гэтага аказалася дастаткова, каб Сабаленка ахапіла паніка. Давід можа перамагчы Галіяфа не толькі прашчой. Слушнае пытанне — таксама добрая зброя (і яе не адняць пры вобшуку), хаця, перакананы, у Сабаленкі па-ранейшаму ўсё будзе добра. Калі справа датычыцца беларусаў і ўкраінцаў, рэпутацыя ў тэнісе вялікага значэння не мае. А ў астатнім Арына цалкам талерантная і выхаваная дзяўчына. У тэнісным туры любяць такіх», — напісаў Гаруновіч.
Нагадаем, напрыканцы траўня ўкраінская тэнісістка Марта Касцюк адмовілася паціснуць руку беларусцы Арыне Сабаленка пасля матча на «Ралан Гарос». «Я разумею, чаму яны не паціскаюць нам рукі. Я магу ўявіць рэакцыю з украінскага боку, калі яны будуць паціскаць нам рукі. Так што я разумею гэта. І разумею, што гэта не адносіцца да мяне асабіста. Вось і ўсё. Яна не заслужыла, каб яе так праводзілі з корта», — заявіла тады беларуска.
Пасля гэтага падчас чарговай прэс-канферэнцыі журналістка «Тр*буны» Дар'я Мешчаракова наўпрост спытала ў прэтэндэнткі на першую ракетку свету пра вайну ва Украіне і падтрымку Лукашэнкі. Сабаленка адмовілася асудзіць і Лукашэнку, і вайну. На зададзеныя пытанні яна адказала: «У мяне няма каментароў для вас».
Пасля гэтага тэнісістка стала адмаўляцца ад адкрытых прэс-канферэнцый.