Латвія спыняе выдачу дазволу на жыхарства грамадзянам Беларусі і Расіі. Але ёсць выключэнні
Грамадзянам Беларусі і Расіі да 30 чэрвеня 2023 года не будуць выдаваць дазволы на жыхарства ў Латвіі. Адпаведнае рашэнне апублікавана на сайце ўрада Латвіі.
Акрамя таго, у адпаведнасці з папраўкамі ў заканадаўства мяркуецца, што грамадзяне і неграмадзяне Латвіі, якія хочуць стаць грамадзянамі іншай краіны і пры гэтым застацца ў Латвіі, павінны здаць тэст на веданне дзяржаўнай мовы і пацвердзіць наяўнасць неабходных фінансаў.
Выключэнні з гэтага рашэння тычацца асоб, якія ўжо знаходзяцца ў Латвіі працяглы час.
Пры гэтым прапануецца зрабіць выключэнне для студэнтаў і навукоўцаў, якія хацелі б застацца ў Латвіі пасля заканчэння вучобы або даследчых праектаў. Таксама выключэнні могуць зрабіць для інвестараў і прадпрымальнікаў, але іх будуць старанна правяраць ведамствы нацыянальнай бяспекі.
Асабліва падкрэсліваецца, што прадугледжаныя ў прававым акце нормы не закранаюць права асоб, якія просяць міжнароднай абароны, на атрыманне адпаведнага статусу міжнароднай абароны.
У Латвіі ВНЖ маюць больш за 9 тысяч грамадзян Расіі. У той жа час больш за 37 тысяч грамадзян РФ маюць пастаянны від на жыхарства. Сярод іх шмат неграмадзян Латвіі, якія атрымалі расійскае грамадзянства.
Нагадаем, раней латвійскі парламент прызнаў Расію дзяржавай, якая падтрымлівае тэрарызм. У заяве Сейма абмяркоўваецца ваенная агрэсія Расіі і маштабнае ўварванне ва Украіну, якое было «ажыццёўлена пры падтрымцы і ўдзеле беларускага рэжыму». Адпаведна, Сейм Латвіі заклікаў краіны Еўрасаюза неадкладна прыпыніць выдачу турыстычных і ўязных віз грамадзянам Расіі і Беларусі.