Надзея Саўчанка таемна сустрэлася ў Мінску з лідэрамі ЛНР і ДНР

7 снежня дэпутат Вярхоўнай Рады Украіны Надзея Саўчанка наведала Мінск цішком, дзе сустрэлася з лідэрамі самаабвешчаных ДНР і ЛНР. Пра гэта са спасылкай на тры ананімных крыніцы паведамляе ўкраінскае выданне ЛІГА.net.

Сустрэчу нібыта арганізавала ФСБ Расіі пры садзейнічанні расійскай амбасады ў Беларусі.
Як распавёў выданню адзін з членаў ўкраінскай дэлегацыі на перамовах у Мінску, 7 снежня, калі дэлегаты прыбылі ў сталіцу Беларусі на чарговую сустрэчу спецпасланнікам Украіны, Расіі і АБСЕ, супрацоўнікі ўкраінскай амбасады паведамілі, што за некалькі хвілін да іх у Менск прыляцелі лідэры непрызнаных ДНР і ЛНР Аляксандр Захарчанка і Ігар Платніцкі.
«Сустрэлі іх прадстаўнікі расійскай амбасады ў суправаджэнні служачых Федэральнай службы бяспекі Расіі. Яны забралі іх, пасадзілі ў машыну і павезлі», — сказала крыніца ЛІГА.net.
Паводле яго слоў, лідэры ДНР і ЛНР не з'явіліся ні на сустрэчы кантактнай групы, ні на падгрупах (пры гэтым навіна, што Захарчанка і Платніцкі прыбылі ў Мінск на пасяджэнне кантактнай групы, 7 снежня з'явілася на рэсурсе «ДНР 24»).
Пры гэтым дзве крыніцы ЛІГА.net сцвярджаюць, што Саўчанка часта бачыцца са сваякамі закладнікаў і пераконвае іх, што ўлады нічога не робяць, і трэба падштурхнуць Адміністрацыю прэзідэнта і прадстаўнікоў Украіны ў Мінску да таго, каб пачаць перамовы не з Масквой, а напрамую з Захарчанка і Платніцкім — прызнаць іх уладу і грамадзянскую вайну як форму бягучага канфлікту.
Суразмоўцы ЛІГА.net сцвярджаюць, што прамыя перамовы азначаюць, што «Расія больш не ўдзельнік вайны, не з'яўляецца бокам канфлікту», і гэта цалкам адпавядае пажаданням Масквы.
«Але ўсе ведаюць, што ніякага вызвалення закладнікаў без рашэння Масквы не будзе — на якія б саступкі і кампрамісы мы ні ішлі. Як бы мы ні стараліся — Масква гэта не дасць зрабіць», — сказалі ЛІГА.net ва ўкраінскай групе.
Крыніца выдання лічыць, што сустрэча Саўчанка, Захарчанка і Платніцкага была прысвечана таму, каб прымусіць афіцыйныя ўлады Украіны весці прамыя перамовы, якія ўзначаліць сама Саўчанка. Ён дадае, што адначасова гэта робіцца для таго, каб дыскрэдытаваць ўладу і саму ідэю мінскіх перамоваў, якія для Масквы даўно перасталі прадстаўляць каштоўнасць.
Па некаторых дадзеных, дэпутат Саўчанка ў бліжэйшыя дні мае намер аб'явіць нейкую інфармацыю, паведамляе ЛІГА.net.
У нядзелю ў Кіеве Надзея Саўчанка прымала ўдзел у канферэнцыі, прысвечанай палонным у Данбасе. Перад пачаткам канферэнцыі журналіст ЛІГА.net прама задаў пытанне дэпутату, навошта яна ездзіла ў Мінск, пра што гаварыла з верхаводамі сепаратыстаў, і чаму ўсё гэта было зроблена сакрэтна.
«Я не для таго сюды прыйшла, каб адказваць на вашы пытанні», — сказала дэпутат. На паўторнае пытанне — адрэзала: «Я што, незразумела сказала?».
«Іншая журналістка — Вольга Сніцарчук — паўтарыла пытанне падчас канферэнцыі. Саўчанка зноў не захацела адказваць, а на паўторнае пытанне і зусім падвысіла голас на журналістку», — піша ЛІГА.net.
Расійскае выданне Life.ru паведамляе, што ў адміністрацыі кіраўніка ДНР Аляксандра Захарчанка абверглі сустрэчу з надзеяй Саўчанка.
Тэлеканал «112 Украіна» паспрабаваў звязацца з прэс-службай самой Саўчанка. Яна пагадзілася пракаментаваць гэтую гісторыю толькі праз тыдзень, паведамляе канал.
Паводле gazetaby.com