«Не турбуйцеся, назад не вернемся»: Арменія пакіне АДКБ?

Нікол Пашынян заявіў пра намер краіны выйсці з Арганізацыі Дагавора аб калектыўнай бяспецы (АДКБ), аднак канкрэтныя тэрміны не назваў. Пазней МЗС краіны пракаментаваў словы Пашыняна — і заявіў, што на самай справе прэм'ер не казаў пра тое, што Арменія пакідае АКДБ. Што адбываецца? 

Арменія пакіне арганізацыю Дамовы аб калектыўнай бяспецы. Пра гэта заявіў прэм'ер-міністр Арменіі Нікол Пашынян у рамках «урадавай гадзіны» ў парламенце, паведамляе Euronews.

«Выйдзем. Мы вырашым, калі», — сказаў Пашынян, калі адказваў на заўвагу апазіцыйнага дэпутата, чаму Арменія толькі выказвае незадаволенасць АДКБ, але не выходзіць з арганізацыі.

Пашынян заявіў, што былыя ўлады краіны ўступілі ў «Саюз-пузыр», чальцы якога разам «з Азербайджанам планавалі вайну супраць нас», цытуе прэм'ер-міністра Арменіі РБК. 

Крыху пазней МЗС Арменіі пракаментаваў словы Пашыняна, заявіўшы, што той не абвяшчаў аб выхадзе краіны з АДКБ.

«Прэм'ер-міністр Арменіі не сказаў, што мы выходзім з АДКБ. Прэм'ер-міністр Арменіі сказаў, што мы вырашым, калі выйсці, але назад не вернемся», — гаворыцца ў паведамленні.

Яшчэ адна пастсавецкая краіна захацела ўступіць у ЕС

У лютым Пашынян ужо абвясціў аб замарозцы сяброўства краіны ў АДКБ. А ў пачатку траўня ўлады Арменіі абвясцілі, што не будуць удзельнічаць у фінансаванні арганізацыі.

Зрэшты, як пісаў НЧ, прэм'ер-міністр Нікол Пашынян яшчэ 22 мая, калі выступаў у парламенце, казаў, што як мінімум дзве краіны Арганізацыі Дагавора аб калектыўнай бяспецы «ўдзельнічалі ў падрыхтоўцы вайны» супраць Арменіі. Зрэшты, тады Пашынян не ўдакладніў, якія краіны мае на ўвазе, але мімаходзь згадаў у сваёй прамове Аляксандра Лукашэнку. Ён адзначыў, што «мэтай 44-дзённай вайны было спыненне існавання Арменіі».

У аўторак, 11 чэрвеня, ЗША і Арменія абвясцілі, што іх адносіны будуць павышаны да ўзроўню стратэгічнага партнёрства.

Раней Пашынян не раз прама заяўляў, што АДКБ не выканала сваіх абавязацельстваў перад Ерэванам.