«Талібан» затрымаў трох супрацоўніц афганскай місіі ААН
Затрыманне было санкцыянаванае мясцовымі чыноўнікамі.
Місія ААН па спрыянні Афганістану (МООНСА) у панядзелак заявіла, што тры яе афганскія супрацоўніцы былі затрыманыя агентамі службы бяспекі руху «Талібан». Затрыманне, гаворыцца ў заяве, з'яўляецца працягам запалохвання мясцовых жанчын, якія працуюць у місіі.
«ААН заклікае да неадкладнага спынення ўсіх падобных актаў запалохвання і дамаганняў, накіраваных супраць яе афганскіх супрацоўніц. Улады Афганістана павінны пацвердзіць і забяспечыць выразныя гарантыі бяспекі ўсяго персаналу ААН, які дзейнічае ў Афганістане», — гаворыцца ў заяве МООНСА.
Намеснік афіцыйнага прадстаўніка руху «Талібан» Білал Карыміпаведаміў агенцтву «Reuters», што «Талібан» «адхіляе абвінавачанні ў дамаганнях і запалохванні». Ён таксама заявіў, што затрыманне было санкцыянавана чыноўнікамі кандагарскага аддзялення Міністэрства прапаганды дабрадзейнасці і прадухілення распусты. Супрацоўніц ААН, паводле прадстаўніка «Талібана», нібыта «пакінулі ў спакоі».
Пасля захопу ўлады ў Афганістане год таму талібы заявілі, што жанчыны не павінны выходзіць з дома без сваяка мужчынскага полу і мусяць закрываць твар, хоць некаторыя жанчыны ў гарадскіх цэнтрах ігнаруюць гэтае правіла.
Многія сярэднія школы для дзяўчынак па-ранейшаму не працуюць, бо талібы адмовіліся ад абяцанняў адкрыць іх у сакавіку. Паводле даных міжнародных агенцтваў развіцця, большасць афганскіх дзяўчынак-падлеткаў на дадзены момант не маюць доступу да навучання, а тысячы жанчын былі выкінуты з працы праз абмежаванні, уведзеныя талібамі, і эканамічны крызіс у Афганістане.
Талібы заяўляюць, што яны паважаюць правы жанчын у адпаведнасці са сваёй інтэрпрэтацыяй ісламскага права.