Удакладненыя дадзеныя: У Кузбасе пры выбуху на шахце загінулі 52 чалавекі

Лічбы ахвяр страшнай трагедыі ў Расіі павялічваліся цягам дня.

Паводле апошніх дадзеных, ахвярамі аварыі на шахце «Листвяжная» ў Кузбасе сталі 52 чалавекі, у тым ліку шэсць ратавальнікаў, паведамляе РІА «Новости».

Паводле звестак намесніка генпракурора Дзмітрыя Дзямешына, прычынай надзвычайнага здарэння стаў выбух метану, выкліканы іскрай, і дынамічны ўдар, які траўмаваў гарнякоў.

Следчыя затрымалі 47-гадовага дырэктара шахты, яго 59-гадовага першага намесніка і 36-гадовага начальніка ўчастка.

«Устаноўлена, што затрыманыя дапусцілі парушэнне патрабаванняў прамысловай бяспекі небяспечных вытворчых аб'ектаў. У выніку адбылася газадынамічная з'ява. Пачалося задымленне вентыляцыйнага штрэка ўчастка № 4, у выніку чаго працоўныя, якія знаходзіліся ў выпрацоўцы, задыхнуліся», — пазначана ў паведамленні.