Знойдзены сляды выбухоўкі. Швецыя пацвердзіла дыверсію на «Паўночным патоку»
Падчас расследавання выбухаў на газаправодзе «Паўночны паток» на месцы здарэння былі знойдзены «староннія прадметы» і сляды выбухоўкі.
Швецыя пацвердзіла дыверсію на «Паўночным патоку». Фота Getty Images
Паводле высноў следчых, на газаправодах сістэмы «Паўночны паток» адбылася сур'ёзная дыверсія, паведамляе пракуратура Швецыі.
«Падчас агляду месца злачынства, які праводзіўся на месцы дыверсіі ў Балтыйскім моры, была зроблена фіксацыя ўсяго і раён быў старанна задакументаваны. Аналізы, якія былі праведзены, паказваюць сляды выбуховых рэчываў на некалькіх са знойдзеных там старонніх прадметах», — гаворыцца ў паведамленні.
Расследаванне працягваецца. У пракуратуры Швецыі высвятляюць, ці можна каму-небудзь прад'явіць абвінавачванне па падазрэнні ў здзяйсненні злачынства.
Нагадаем, 27 верасня на расійскіх трубаправодах «Паўночны паток-1» і «Паўночны паток-2» амаль адначасова ўтварыліся некалькі ўцечак газу. Па словах шведскіх сейсмолагаў, прычынай гэтага мог быць выбух.
Пра ўцечкі газу з дзвюх нітак «Паўночнага патоку» ў раёне вострава Барнхольм паведамілі тады ўлады Даніі і Швецыі. Газ з пашкоджаных труб выцякаў некалькі дзён. Бурбалкі на паверхні мора мелі дыяметр каля 100 метраў. Улады закрылі для суднаходства зону ў пяць марскіх міль вакол месца аварыі. Газ па «Паўночным патоку» ў Еўропу не пастаўляўся з лета з-за аварыі на неактыўных, але запоўненых газам падводных газаправодах.
Прэзідэнт ЗША Джо Байдэн заявіў, што з вялікай верагоднасцю трубаправоды падарвала сама Расія.
Пазней, 29 кастрычніка, Расія заявіла, што спецыялісты Вялікабрытаніі нібыта «маюць дачыненне да падрыву газаправода». Як заўсёды, аніякіх доказаў з боку РФ прадстаўлена не было. У Мінабароны Брытаніі назвалі такія абвінавачванні Расіі выдумкай.
Пры гэтым нямецкія следчыя таксама ўпэўненыя, што «Паўночны паток» падарвалі расіяне. Там адзначылі, што іх версія з дыверсіяй супадае з папярэднімі высновамі Швецыі.
Паводле www.pravda.com.ua, «Медуза», РБК