Беларуская асацыяцыя журналістаў стала лаўрэатам сусветнай прэміі ЮНЕСКА

Беларуская асацыяцыя журналістаў стала лаўрэатам сусветнай прэміі ЮНЕСКА / Гільерма Кано за ўнёсак у свабоду прэсы. 27 красавіка журы прэміі агучыла адпаведнае рашэнне.

«Ад самага дня заснавання ў 1995 годзе і да сёння галоўная місія нашай арганізацыі — абарона правоў журналістаў і медыя. На жаль, апошнія гады беларускі медыясектар вымушаны працаваць пад ударам небывалых рэпрэсій з боку ўладаў», — каментуе прэс-служба БАЖ.

У арганізацыі зафіксавана больш за тысячу выпадкаў парушэння правоў журналістаў: арышты, ператрусы, гвалт супраць прадстаўнікоў медыя. На сёння за кратамі знаходзяцца 24 прадстаўнікі беларускіх СМІ, адзначае Еўрарадыё.

Дарэчы, і сама недзяржаўная журналісцкая арганізацыя 27 жніўня 2021 года была пазбаўленая юрыдычнай рэгістрацыі.

«БАЖ расцэньвае высокую ўзнагароду ЮНЕСКА як падтрымку ўсёй незалежнай журналісцкай супольнасці Беларусі», — адзначаецца ў паведамленні прэс-службы.