Брэсцкага экаактывіста міліцыя аштрафавала за распаўсюд улётак
Падчас традыцыйнай нядзельнай акцыі ў Брэсце супраць завода АКБ супрацоўнікі міліцыі 26 красавіка затрымалі экаактывіста Міхаіла Галузу.
Аляксандр Кабанаў і Міхаіл Галуза (справа). Фота: racyja.com
Падставай для затрымання стала "вызначэнне асобы", паведамляе "Берасцейская Вясна".
А 17-ай гадзіны ў яго хаце супрацоўнікі міліцыі зладзілі агляд. Намеснік начальніка Ленінскага РАУС Брэста Мікалай Самасюк па тэлефоне паведаміў жонцы Міхаіла Галузы, што яго затрымалі за распаўсюд улётак. Казаў, што Міхаіла яшчэ ў суботу за распаўсюдам зафіксавалі і ў нядзелю бачылі. Падчас агляду машыны Міхаіла Галузы супрацоўнікі міліцыі знайшлі ўлёткі. На падставе гэтага склалі два пратакола па ч.2 арт. 21.14 КаАП “Парушэнне правілаў добраўпарадкавання і ўтрымання населеных пунктаў”.
Намеснік начальніка Ленінскага РАУС Брэста Мікалай Самасюк выпісаў дзве пастановы аб адміністрацыйным правапарушэнні паводле ч.2 арт. 21.14 КаАП і аштрафаваў экаактывіста на 10 і 25 базавых велічыняў. У суме штраф для актывіста за распаўсюд улётак склаў 945 беларускіх рублёў.
Міхаіл Галуза знаходзіўся ў міліцыі каля 8 гадзін. На волю ён выйшаў толькі а 21-й гадзіны.
Нагадаем, трох брэсцкіх актывістаў, праціўнікаў завода АКБ Аляксандра Кабанава, Дзмітрыя Андрасюка і Дзмітрыя Бекалюка 20 і 22 красавіка суд пакараў 15 суткамі арышту за удзел у несанкцыянаваным масавым мерапрыемстве.
Грамадскае аб'яднанне "Экадом” заклікае выказаць затрыманым актывістам словы падтрымкі, даслаўшы ліст або паштоўку, па адрасе: ІЧУ Ленінскага РАУС г. Брэста, 224001, г. Брэст, Паўночны гарадок, 10.
Праваабарончы цэнтр "Вясна" заклікаў беларускія ўлады адмовіцца на перыяд абвешчанай пандэміі ад прымянення адміністрацыйнага затрымання на тэрмін звыш 3-х гадзін і адміністрацыйнага арышту. Адначасова праваабаронцы нагадваюць пра недапушчальнасць выкарыстоўваць адміністрацыйныя спагнанні ў мэтах абмежавання правоў чалавека і асноўных свабод, у тым ліку — свабоды выказвання меркаванняў і мірных сходаў. "Вясна" заклікала вызваліць ад адміністрацыйнага арышту актывістаў экалагічнага пратэсту ў Брэсце — Аляксандра Кабанава, Дзмітрыя Андрасюка і Дзмітрыя Бекалюка.