Прысуд палітвязню Арцёму Анішчуку за абразу міліцыянта пакінулі ў сіле

Арцём Анішчук на судзе віну не прызнаў і заявіў, што новая крымінальная справа — гэта помста начальніка калоніі № 15, дзе ён зазнаваў катаванні і збіццё.

photo_2022_09_23_08_26_43.jpg

У Магілёўскім абласным судзе 22 верасня разглядзелі апеляцыйную скаргу палітзняволенага Арцёма Анішчука. Суддзя Сяргей Каралёў пакінуў прысуд без змен. У хуткім часе Арцёма этапуюць у калонію, паведамляюць праваабаронцы.


Арцём Анішчук спачатку быў фігурантам справы аб пашкоджанні аўтамабіля жонкі міліцыянта: «пракалолі шыны, запенілі мантажнай пенай дзвярныя праёмы, залілі фарбай кузаў». За гэта яго асудзілі на 2 гады зняволення. Арцём мусіў выйсці на волю 29 чэрвеня, адбыўшы цалкам тэрмін, але гэтага не здарылася — яго ўзялі пад варту па новай справе. Пазней суд Ленінскага раёна Магілёва 25 ліпеня асудзіў Арцёма Анішчука па новай крымінальнай справе — за абразу міліцыянта.

У выніку суддзя Нікіфарава склала прысуды па дзвюх крымінальных справах (нават па той, па якой Арцём цалкам адбыў тэрмін) і прызначыла палітвязню ў суме тры гады калоніі, два з якіх ён адбыў. 


Арцём на судзе віну не прызнаў і заявіў, што новая крымінальная справа — гэта помста начальніка калоніі № 15, дзе ён зазнаваў катаванні і збіццё. Цяпер Арцёму засталося адбываць яшчэ каля года зняволення.

Нагадаем, першы раз Арцём Анішчук быў сярод пяцярых, затрыманых 29 верасня ў Баравой. Суд Мінскага раёна 3 лютага 2021 года вынес ім прысуды па крымінальнай справе за пашкоджанне аўтамабіля жонкі міліцыянта. Іх абвінавачвалі паводле ч. 2 арт. 339 Крымінальнага кодэкса («Злоснае хуліганства»). Матэрыяльная шкода склала 5 222 рублі 88 капеек. Суддзя Віктар Шаўцоў пакараў Арцёма двума гадамі калоніі.