«Двое Эйсмантаў для кантролю над прэсай — перабор». Фрыдман — пра прызначэнне Маркава
У кадравай калодзе Лукашэнкі няма новых людзей, яму даводзіцца перастаўляць з месца на месца наяўныя кадры.
Былы кіраўнік тэлеканала АНТ Марат Маркаў прызначаны міністрам інфармацыі. Як вядома, ранейшы міністр інфармацыі Уладзімір Пярцоў 8 красавіка прызначаны намеснікам кіраўніка адміністрацыі Лукашэнкі і стаў куратарам ідэалагічнай працы ў краіне. А крэсла міністра пуставала аж да 13 чэрвеня.
«За магчымасці вы адкажаце галавой. Там грошы немалыя. І вы павінны працягнуць тыя праграмы, якія вы намецілі. У свой час я нагрузіў гэтым Пярцова, давяраючы яму. Я не менш давяраю і Маркаву. Але за грошы і за вынік, за новыя праграмы, хоць гэта, можа, непасрэдна і не тычыцца міністра», — абвясціў Лукашэнка падчас прызначэння Маркава.
«Вы ў нас сапраўды, як сказаў тут намеснік кіраўніка адміністрацыі, адзінкавы тавар. І на вас нагрузка будзе большая, і попыт з вас будзе большы. Аказваць дапамогу тут не трэба. За гэта трэба адказваць і падключаць ўсіх, каго вы палічыце патрэбным. І АНТ, і СТВ, і Першы канал, хоць ён (кіраўнік Белтэлерадыёкампаніі) таксама фактычна на пасадзе міністра — прыраўнаваная пасада. Але ён тут на гэта павінен працаваць усяляк», — растлумачыў Лукашэнка.
І вярнуўся да грашовай тэмы: «Галоўнае — грошы, фінансы, вы іх павінны трымаць у руках і кожнаму даваць па капейцы туды, куды трэба. Гэта галоўнае для мяне. Арганізацыйна трошкі дапаможаце. І яны ж павінны варушыцца. І Пярцоў перш за ўсё», — сказаў на заканчэнне Лукашэнка.
Пра што сведчаць перастаноўкі ў інфармацыйнай сферы? Выданне bgmedia.site пагаварыла пра гэта з гісторыкам, палітычным аглядальнікам Аляксандрам Фрыдманам.
— Маркаў пайшоў на павышэнне: яго заслугі прызнаныя. Цяпер ён будзе курыраваць усю медыйную сферу. Па іерархіі пасаду міністра мог займаць альбо Эйсмант, альбо Маркаў, у такіх дзеячаў, як Гігін, і так пасад хапае. Чаму Маркаў, а не Эйсмант? Думаю, Лукашэнка палічыў, што двое Эйсмантаў для кантролю над прэсай — усё ж такі перабор (Наталля Эйсмант з'яўляецца прэс-сакратаркай Лукашэнкі. — рэд.), таму і зрабіў выбар на карысць Маркава.
А пасада старшыні праўлення ЗАТ «Другі нацыянальны тэлеканал» для Луцкага, як я разумею, — паніжэнне. Перавод з пасады намесніка кіраўніка адміністрацыі кіраўніком тэлеканала відавочнае паніжэнне. Але Лукашэнка любіць такія гульні, такім чынам тасаваць кадры.
Наогул у кадравай калодзе Лукашэнкі няма новых людзей, яму даводзіцца перастаўляць з месца на месца наяўныя кадры. Абойма, з якой даводзіцца выбіраць, невялікая.
Глядзіце таксама
(Ігар Луцкі з'яўляўся міністрам інфармацыі ў 2020-2021 гадах, генеральным дырэктарам тэлеканала СТБ (2018-2020), а з 5 красавіка 2021 года прызначаны намеснікам кіраўніка АП. 13 чэрвеня Лукашэнка вярнуў яго «на сваю сцежку» — старшынём праўлення ЗАТ «Другі нацыянальны тэлеканал»).
— Але ў Беларусі куды ні плюнь — трапіш у прапагандыста.
— Прапагандысты тут не падыдуць, тут менеджар патрэбны. Вось Лукашэнка і вырашыў, што Маркаў справіцца. Паглядзім.
— Дарэчы, Лукашэнка заявіў, што вылучае на прапаганду шмат сродкаў, што і не дзіўна напярэдадні прэзідэнцкай кампаніі 2025 года.
— Таму Маркаў і заяўляе, што галоўная мэта — поўны кантроль над інфармацыйным полем. Маркаў правёў чысткі на сваім тэлеканале, таму, як мне здаецца, са сваёй задачай справіўся. Гэта кадравае прызначэнне ўкладваецца ў логіку Лукашэнкі.
— І ў логіку прэзідэнцкай кампаніі 2025 года?
— Вядома, там павінен быць поўны жалезны кантроль над любымі
меркаваннямі, над іншадумствам.