«Абысці лецішчы па ўсёй краіне». Пасля дыверсіі ў Мачулішчах сілавікі ўзяліся за дачнікаў

Максім (імя зменена) — жыхар Брэста. Недалёка ад горада ў яго сям'і ёсць лецішча. Увечары ў нядзелю, 12 сакавіка, калі мужчына быў там, да яго ў дзверы пагрукаў міліцыянт. Пра яшчэ адно міліцэйскае наступства дыверсіі на ваенным аэрадроме ў Мачулішчах распавяло «Л*стэрка».

Са слоў Максіма, супрацоўнік перапісаў ягоныя звесткі, спытаў, ці не бачыў той каго-небудзь падазронага, і паведаміў, што пасля інцыдэнту ў Мачулішчах яны абыходзяць дамы ў садовых таварыствах.

Лецішча сям'і Максіма знаходзіцца ў садовым таварыстве прыкладна за паўтара кіламетра ад Брэста. Там «каля сарака» дамоў.

— У нядзелю ўвечары мы з жонкай былі на лецішчы. Сядзім — і тут стук у дзверы. Глядзім, міліцыянт, — апісвае сітуацыю суразмоўца. — Ён спытаў: «Бачылі, што адбылося ў Мачулішчах?» — і стаў казаць, што дыверсанты хаваліся ў садовых хатках, таму паступіла каманда абысці дамы ў садовых таварыствах па ўсёй краіне.

Максім не ўдакладняў у супрацоўніка, ці шукае міліцыя кагосьці, ці проста глядзіць абстаноўку.

— Міліцыянт папрасіў прайсці ў дом і прысесці. Запытаў прозвішча, імя — мае і жонкі, нашы нумары тэлефонаў. Цікавіўся, ці бачылі мы нешта падазронае, напрыклад, бяздомных або падазроных асоб. Мы адказалі, што не. Пра суседзяў нам таксама няма чаго было сказаць, бо мы амаль ні з кім не маем зносін, — успамінае Максім, пра што яго пыталіся. — Акрамя таго, ён цікавіўся, ці не займаецца хтосьці скупкай металаў, і прапаноўваў паставіць дом пад ахову.

Анкета, працягвае Максім, была кароткая. Пытанняў аб сітуацыі ў Мачулішчах або, напрыклад «Ці ёсць у вас дрон?» у ёй не было. Пасля размовы з міліцыянтам Максім патэлефанаваў знаёмаму, у якога таксама ёсць дом у садовым таварыстве за некалькі кіламетраў ад Брэста. Да яго прыяцеля міліцыя пакуль не прыходзіла.

Карбалевіч: Інцыдэнт у Мачулішчах — трыгер для новага вітка палітычнага тэрору

Дзяжурны брэсцкага РАУС, куды звярнулася чытачка, родныя якой жывуць у тым жа садовым таварыстве, але ў нядзелю не знаходзіліся на лецішчы, адносна абыходу дамоў міліцыянтам сказаў так:

— Такое можа быць. Гэта праводзяцца мерапрыемствы па ахове грамадскага парадку.

Больш дэталёва на пытанне, з чым могуць быць звязаны такія візіты, міліцыянт не адказаў. На пытанне, ці мае гэта дачыненне да сітуацыі з самалётам, рэкамендаваў «не перажываць».

Выданне спытала ў чытачоў-дачнікаў, ці сутыкаліся яны з чымсьці падобным. Было апытана больш за дзесяць чалавек з розных раёнаў краіны. Ні да каго з іх міліцыя пасля інцыдэнту ў Мачулішчах пакуль не прыходзіла, але быў выпадак, што 10 сакавіка міліцыянт тэлефанаваў старшыні таварыства.

— У пятніцу яму патэлефанаваў чалавек, прадставіўся міліцыянтам і сказаў адправіць яму звесткі тых, хто жыве ў садовым таварыстве, — распавёў чытач, лецішча якога знаходзіцца ў Смалявіцкім раёне. — Акрамя таго, яго цікавілі звесткі пра кіраўніцтва таварыства, колькі ў нас участкаў, іх схема, плошча, звесткі пра вартаўнікоў. Пакуль яму ніхто нічога не высылаў: папрасілі ад яго афіцыйны ліст.

Яшчэ адна чытачка, лецішча якой знаходзіцца ў Мінскім раёне, распавяла, што на мінулых выходных у іх садовым таварыстве павінна была прайсці сустрэча з міліцыяй. Тэмы мерапрыемства жанчына не ведае.

— Але потым у чаце таварыства паведамілі, што ўсё пераносіцца.

Нагадаем, у выніку дыверсіі ў Мачулішчах 26 лютага быў пашкоджаны і транспартаваны на рамонт у Таганрог звышкаштоўны расійскі самалёт А-50, які дапамагае наводзіць расійскія ракеты на ўкраінскія гарады. Кошт такога самалёта складае каля 330 млн долараў. Адказнасць за дыверсію ўзяла на сябе ініцыятыва былых беларускіх сілавікоў «B*POL».

Улады некалькі дзён маўчалі з нагоды інцыдэнту, а прапаганда ўвогуле яго адмаўляла, настойваючы, што расійскі А-50 «жывы і здаровы». Потым іх «абверг» асабіста Лукашэнка, які падчас цэрэмоніі ўручэння дзяржаўных узнагарод зладзіў істэрыку, усклаў адказнасць за здарэнне на СБУ і ЦРУ і некалькі разоў назваў украінскага прэзідэнта Уладзіміра Зяленскага «гнідай».

Таксама Лукашэнка даў загад правесці па ўсёй краіне «зачыстку» супраць нязгодных. У тыя дні прапагандысты распавялі пра затрыманне аднаго з меркаваных удзельнікаў дыверсіі — украінца з расійскім пашпартам Мікалая Швеца. Ці сапраўды ён кіраваў дронамі з выбухоўкай, невядома.