«Яшчэ крыху, і яны пачнуць высвятляць, у каго стабільнасць больш правільная»
Аўтар тэлеграм-каналу «Лісты да дачкі» разважае, чаму ў нібыта «стабільнай і моцнай» улады раптам здарыўся «рассінхрон» у дзеяннях. Можа быць таму, што яна насамрэч не моцная і маналітная, як мы сабе ўяўляем?
Фота з rebeltv.eu
Як я разумею, беларускі КДБ вырашыў браць сабе зорачкі якасцю, а не колькасцю, як некаторыя. Вось іншыя красаўцы як пачалі, так і да гэтага саджаюць людзей за каментары, за татуіроўкі, за фатаграфіі. Таму што няма ў іх ні ўяўлення, ні фантазіі. А ў КДБ уяўленне ёсць. Таму КДБ нафантазіраваў сабе дыверсантаў, шпіёнаў і агентаў украінскай выведкі. Шэсць чалавек.
Якасць гэтых тэрарыстаў, праўда, нейкая сумніўная. Але які КДБ, такіх ён сабе знайшоў і тэрарыстаў. Іншыя, мабыць, проста не адгукнуліся на ананімныя прапановы ў месенджарах. А хто адгукнуўся, тых і знайшлі. Але для зорачак на пагонах любых тэрарыстаў хопіць. На самай справе. Ну хто там цяпер пойдзе правяраць? Сказалі ў тэлевізары, што дыверсанты, значыць дыверсанты і ёсць.
Не вельмі, вядома, зразумела, для чаго Украіне пасылаць дыверсантаў у Беларусь, пасля таго як з Беларусі сышлі амаль усе расійскія войскі. Але каб задаць гэтае пытанне, трэба задзейнічаць логіку і здаровы сэнс. А логіка і здаровы сярод беларускіх красаўцаў не ў пашане. Фантазія важней.
Таму беларускі КДБ ловіць украінскіх дыверсантаў. А ў самы разгар гэтай інфармацыйна-шпіёнскай кампаніі Беларускі памежны камітэт кажа, што ён гатовы адкрыць межы для ўкраінскіх грамадзян. Гэта вось, пытанне, навошта? Каб у беларускага КДБ было больш шпіёнаў і дыверсантаў, якіх яму потым трэба лавіць?
Гэта значыць, у беларускага КДБ адны фантазіі, а ў беларускіх памежнікаў зусім іншыя. А ў беларускага Міністэрства быццам бы замежных спраў наогул трэція. Не кажучы ўжо пра разнастайнасць беларускім тэлевізары. У беларускага тэлевізара фантазіі наогул ляжаць дзесьці ў абласцях неэўклідавай прасторы.
І ўсе гэтыя фантазіі ўсё цяжэй паміж сабой сінхранізаваць. Таму што яны, па-першае, вельмі розныя, а па-другое, пастаянна мяняюцца. І калі Міністэрству быццам бы замежных спраў даводзіцца фантазіяваць пра ўмацаванне добрасуседства, то красаўцам з КДБ трэба нафантазіраваць сабе на новыя зорачкі на пагоны. І, вядома, гэтыя фантазіі паміж сабой не супадаюць. А потым Міністэрству абароны даводзіцца фантазіяваць на тэму ўмацавання сваёй абараназдольнасці.
Не дзіўна, што памяркоўныя сведкі стабільнасці і сведкі стабільнасці радыкальнага толку абзываюць адзін аднаго нядобрымі словамі. Тут вунь красаўцы паміж сабой дамовіцца не могуць. А ў красаўцаў ж ваенная дысцыпліна.
І растлумачыць ім, у які бок трэба сінхронна фантазіяваць няма каму. Таму што хтосьці моцна заняты. Ён то слухае як у поле расце рапс, то любуецца прыгажунямі на сцэне.
Вось беларускія ўлады намалявалі сабе народнае адзінства, выключыўшы з гэтага адзінства грамадзян сумнеўнай палітычнай лаяльнасці. Але зараз жа высвятляецца, што і сярод сведак стабільнасці справы з народным адзінствам ідуць няроўна. Яшчэ крыху, і яны пачнуць крымінальна-прававымі метадамі высвятляць паміж сабой, у каго стабільнасць правільней.
Глядзіце таксама
