Справа Гараўскага: Хто аддаваў загады «эскадрону смерці»?
Сёння ў швейцарскім Санкт-Галене агучаць прысуд экс-байцу САХРа Юрыю Гараўскаму. Калі яго прызнаюць вінаватым у выкраданні беларускіх апазіцыянераў, факты злачынстваў рэжыму Лукашэнкі ўпершыню будуць зафіксаваныя юрыдычна.
Гараўскага судзяць у межах універсальнай юрысдыкцыі ў Швейцарыі. Былога спецназаўца абвінавачваюць у выкраданні экс-міністра МУС Беларусі Юрыя Захаранкі, экс-старшыні ЦВК Віктара Ганчара і бізнэсоўца Анатоля Красоўскага.
Швейцарскае заканадаўства не дазваляе прыцягнуць Гараўскага да адказнасці па больш сур’ёзным крымінальным артыкуле – за забойствы ці саўдзел у іх, бо імаверныя расправы над апанентамі рэжыму адбываліся на тэрыторыі Беларусі. Таму судзяць экс-сілавіка за датычнасць да «шматлікіх знікненняў».
Глядзіце таксама
Гараўскі прызнае свой удзел у выкраданні апанентаў рэжыму, але катэгарычна адмаўляе датычнасць да забойстваў. «Я не забіваў, забівалі іншыя! Чаму я павінен несці за гэтае адказнасць?» – эмацыйна запытваўся ён падчас судовых разбіральніцтваў у Санкт-Галене 19–20 верасня.
Фігурант справы заўважна змяніў свае паказанні ў судзе і адкрыта прасіў для сябе мяккага пакарання.
Пракурор Петэр Хангартнер запатрабаваў для падсуднага 3 гады пазбаўлення волі, два з якіх умоўна.
Глядзіце таксама
Першапачаткова суддзя Олаф Хумбель паведаміў, што прысуд будзе вынесены ў пісьмовай форме. Але пазней на інтэрнет-старонцы суда з’явілася інфармацыя, што рашэнне па справе Гараўскага ўсё ж такі будзе агучана вусна сёння, 28 верасня.
Швейцарскі суд сапраўды незалежны, на яго не ўплывае палітычная кан’юнктура. Калі ж прысуд акажацца абвінаваўчым, на што спадзяюцца сваякі ахвяраў рэжыму, дэмакратычная грамадскасць, то гэта будзе горкая пілюля для афіцыйнага Мінска. Прывід Гаагі падбярэцца да Лукашэнкі і яго сілавікоў яшчэ бліжэй.
Матэрыялы суда могуць даць падставу для разгортвання іншых падобных працэсаў. Яны б дазволілі глыбей раскапаць шматлікія злачынствы эпохі Лукашэнкі супраць палітычных апанентаў ягонага рэжыму.
Глядзіце таксама
