«Любімую не аддаюць» па-кітайску. КНР і непазбежнасць «ўз'яднання» з Тайванем — нават сілай

Кітай лічыць непазбежным «уз'яднанне» з Тайванем. Гатовы нават ужыць сілу.

Кітайскія вайскоўцы. Фота: eng.chinamil.com.cn

Улады Кітая заявілі пра немінучае «ўз'яднанне» краіны з Тайванем. Гатовыя ўжыць сілу, калі не атрымаецца дасягнуць мэты мірным шляхам.

Кітай апублікаваў «Белую кнігу» — інфармацыйны бюлетэнь, у якім улада выкладае сваю пазіцыю па важных пытаннях.

У «Белай кнізе» раскрываецца тэзіс пра «ўз'яднанне» Кітая і Тайваня, што «з'яўляецца агульным імкненнем усіх кітайскіх сыноў і дачок» і нібыта грунтуецца на прынцыпах стваральнікаў сучаснай КНР — Маа Цзэдуна і Дэн Сяапіна, адзначае агенцтва «Сіньхуа».


Улады Кітая дадаюць, што Пекін гатовы да мірнага «ўз'яднання», аднак не выключаюць сілавы сцэнар захопу востраву, калі «не будзе іншага выбару».

Таксама адзначаецца, што ў выпадку ўваходжання ў склад Кітая Тайваню гарантуюць, што ён будзе доўгі час мець высокую ступень аўтаноміі і зможа ўкараніць сацыяльную сістэму, якая будзе адрознівацца ад мацерыковай.


Кітай лічыць Тайвань сваёй неад'емнай часткай. Пры гэтым дэ-факта Пекін не кантраляваў востраў з моманту заканчэння Грамадзянскай вайны і стварэння КНР у 1949 годзе.

Абстаноўка вакол Тайваня абвастрылася на фоне візіту на востраў спікера Палаты прадстаўнікоў ЗША Нэнсі Пэлосі 2 жніўня. Перад гэтай паездкай Кітай пачаў маштабныя ваенныя вучэнні ля берагоў Тайваня з выкарыстаннем сучаснай зброі — у прыватнасці, гіпергукавых ракет DF-17 і знішчальнікаў-невідзімак J-20. Тайвань назваў гэтыя вучэнні Кітая рэпетыцыяй нападу. Вучэнні завяршыліся сёння, 10 жніўня.


Паводле РБК, «Медуза»



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: