«Свет павінен патрабаваць ад дыктатара адказу: дзе Віктар Бабарыка? Пакажыце нам, што ён жывы»
«Нельга дапусціць, каб беларускія палітвязні зніклі». The Washington Post выйшла з аўтарскай калонкай наконт праблемы беларускіх палітвязняў.
Буйное амерыканскае выданне The Washington Post выпусціла рэдакцыйную калонку аб знікненні палітвязняў у Беларусі, звярнула ўвагу «Св*бода».
Аўтары артыкула адзначылі, што сёння беларускі рэжым «падобна, выкарыстоўвае яшчэ больш рэпрэсіўную тактыку, як у Паўночнай Карэі».
Выданне The Washington Post адзначае, што ўжо 22 дні невядомыя стан і месцазнаходжанне палітвязняволенага кандыдата ў прэзідэнты, які быў лідарам незалежных апытанняў 2020 году, Віктара Бабарыкі. Таксама, падкрэслівае WP, няма звестак пра Марыю Калеснікаву, Ігара Лосіка, Сяргея Ціханоўскага, Мікалая Статкевіча і іншых палітвязняў. У артыкуле згадваецца і пераслед адвакатаў палітзняволеных.
«НЧ» пераклаў калонку амерыканскага выдання:
«Віктар Бабарыка, паспяховы банкір сярэдняга ўзроўню, калі балатаваўся ў прэзідэнты Беларусі ў 2020 годзе, паабяцаў усталяваць дэмакратыю, падзел уладаў і абмежаванне тэрмінаў паўнамоцтваў пасля амаль трох дзесяцігоддзяў аўтакратыі Аляксандра Лукашэнкі. Бабарыка лідзіраваў у перадвыбарчых апытаннях.
Спадар Бабарыка быў арыштаваны перад галасаваннем у судовым парадку, каб не даць яму ўдзельнічаць у перадвыбарчай агітацыі, а затым асуджаны на 14 гадоў пазбаўлення волі па сфабрыкаваным абвінавачанні ў хабарніцтве.
Цяпер ён і іншыя вядомыя палітвязні зніклі.
У пачатку гэтага года спадара Бабарыку трымалі без права зносін. Нават адвакаты не атрымлівалі ніякіх вестак пра яго з лютага. «Лістоў ад Бабарыкі не паступае, да яго не дапускаюць сваякоў і адвакатаў», — сказаў прэс-сакратар Бабарыкі спадар Германчук. «Апошнім часам ён увесь час знаходзіцца ў ШІЗА», — дадаў ён.
Тады, 27 красавіка, прэс-сакратар паведаміў, што спадар Бабарыка шпіталізаваны ў наваполацкай калоніі. Паведамляецца, што ён быў збіты так жорстка, што лекары не пазналі яго, пакуль не ўбачылі яго імя ў запісах, і ім прыйшлося лячыць пнеўматоракс.
З таго часу пра спадара Бабарыку ніхто не чуў і ніхто не ведае, дзе ён.
Былы юрыст яго перадвыбарчага штаба Ілля Салей заявіў : «Сітуацыя сапраўды катастрафічная, у першую чаргу з-за таго, што няма інфармацыі. …Наколькі я разумею, ідзе нейкая кампанія, каб цалкам ізаляваць палітычных лідараў ад знешняга свету і інфармацыі, каб паўплываць на іх, магчыма, не толькі маральна, але і фізічна».
Што яшчэ горш, рэжым Лукашэнкі таксама спрабаваў нейтралізаваць адвакатаў палітвязняў. 20 сакавіка, паводле інфармацыі праваабарончай арганізацыі «В*сна», былі арыштаваныя шэсць адвакатаў, якія працавалі на вядомых палітвязняў. Сярод іх Іван Чыжык, апошні адвакат, які прадстаўляў інтарэсы спадара Бабарыкі.
Іншыя вядомыя палітвязні таксама зніклі. Марыя Калеснікава, кіраўніца кампаніі Бабарыкі, якая пазней далучылася да Святланы Ціханоўскай — яны выйгралі выбары 2020 года, якія потым у іх скраў спадар Лукашэнка, — дагэтуль знаходзіцца ў зняволенні, і пра яе няма чутак амаль тры месяцы.
Амаль столькі ж не выходзіў на сувязь папулярны блогер Ігар Лосік, які таксама знаходзіцца ў зняволенні. Муж спадарыні Ціханоўскай Сяргей, які раней балатаваўся ў прэзідэнты і быў зняволены, каб выбіць яго з выбарчай гонкі, таксама быў адрэзаны ад сувязі.
Спадарыня Ціханоўская, якая цяпер жыве ў выгнанні, заявіла ў чацвер, што нічога не чула пра мужа ўжо два месяцы, і заявіла: «Беларускі рэжым хавае палітвязняў за сцяной маўчання. Мы павінны разбіць гэтую сцяну. Мы не можам дазволіць рэжыму катаваць і забіваць сваіх апанентаў».
Па стане на 18 траўня «В*сна» выявіла 1497 палітвязняў у Беларусі, аднак сапраўдная лічба, верагодна, большая. Раней адвакаты і праваабаронцы ў Беларусі маглі адсочваць іх месцазнаходжанне. Цяпер рэжым, падобна, выкарыстоўвае нават больш рэпрэсіўную тактыку, як у Паўночнай Карэі, дзе зняволеныя гвалтоўна знікаюць на месяцы ці гады. Між тым спадар Лукашэнка апошнія тыдні таксама трымаўся па-за ўвагай грамадскасці, мабыць, сур'ёзна хворы.
Увесь свет павінен патрабаваць ад дыктатара адказу: дзе Віктар Бабарыка? Пакажыце нам, што ён жывы. Што сталася з іншымі? Нельга дапусціць, каб беларускія палітвязні зніклі».
