Пазбаўленыя волі і здароўя. З якімі сур'ёзнымі хваробамі сядзяць палітвязні
З анкалогіяй, хворым сэрцам, бранхіяльнай астмай, эпілепсіяй — Св*бода расказала, з якімі сур’ёзнымі дыягназамі ў Беларусі сядзяць палітвязні.
1. Васіль Берасьнеў. Моцныя болі ў адзінай нырцы
Берасьнеў — актывіст незалежнага прафсаюзу РЭП з Воршы, яму 72 гады. Актывіста затрымалі ў «справе прафсаюзаў». Ён за кратамі ўжо 5 месяцаў. Яму пагражае 4 гады калёніі.
Са словаў сваякоў, Васіль пакутуе ад моцных боляў у адзінай нырцы. Другую з прычыны анкалягічнага захворваньня выдалілі ў 2018 годзе. У крытычныя моманты яму ставяць кропельніцу, якая не вырашае праблему. Іншай мэдычнай дапамогі, як сьцьвярджаюць сваякі, няма.
Адрас для лістоў: СІЗА-1. 220030, г. Мінск, вул. Валадарскага, 2, Васіль Ціханавіч Бераснеў.
2. Павал Вінаградаў. Сухоты
Вінаградаў — блогер і актывіст, яму 33 гады. Яго затрымалі 9 месяцаў таму. Далі 5 гадоў калёніі за адзін пост у Facebook, у тым ліку за «паклёп на Лукашэнку». КДБ унёс Вінаградава ў «тэрарыстычны сьпіс».
Нядаўна на рэнтгене ў ягоных лёгкіх знайшлі пляму. Пазьней пацьвердзілі сухоты. Вязьня перавялі ў аршанскую калёнію № 12, дзе лечаць асуджаных, хворых на актыўную форму сухотаў.
За кратамі Павал схуднеў на 36 кіляграмаў. Яго каралі штрафным ізалятарам за тое, што прылёг удзень на ложак. Пазбавілі працяглага спатканьня і вялікай перадачы.
Адрас для лістоў: Папраўчая калонія № 12. 211381 Віцебская вобласць, г. Орша, вул. Смаленская, 2, Павел Юр'евіч Вінаградаў.
3. Ксенія Луцкіна. Пухліна ў мозгу
Луцкіна — былая журналістка БТ, ёй 38 гадоў, ёсьць малы сын. За кратамі яна ўжо 1 год і 9 месяцаў. Яе вінавацяць у «змове або іншых дзеяньнях з мэтай захопу ўлады». Журналістку пачалі судзіць у Менску. Ёй пагражае да 12 гадоў калёніі.
Ксенія расказала на працэсе, што за час у турме ў яе значна пагоршыўся стан здароўя: павялічваецца пухліна галаўнога мозгу, ад чаго яна рэгулярна прымае моцнадзейныя лекі. Таксама ў яе абвастрылася бранхіяльная астма. У 2014 годзе Ксеніі зрабілі апэрацыю і выдалілі дзьве пухліны ў мозгу.
Адрас для лістоў: СІЗА-1. 220030, г. Мінск, вул. Валадарскага, 2. Ксенія Алегаўна Луцкіна.
4. Ігар Леднік. Праблемы з сэрцам і стрававальнай сыстэмай
Леднік — барысаўскі сябра БСДП, яму 60 гадоў. Ён за кратамі 5 месяцаў. Актывісту далі 3 гады калёніі за «паклёп на Лукашэнку».
Ігар — інвалід другой групы, мае праблемы з сэрцам. Сёлета ў чэрвені стан палітвязьня пагоршыўся. Ён ляжаў у санітарнай частцы СІЗА. У ліпені стала вядома, што актывісту зрабілі апэрацыю на страўнікава-кішачным тракце.
Адрас для лістоў: Следчая турма № 8. 222163, г. Жодзіна, вул. Савецкая, 22А. Ігар Аляксандравіч Леднік
5. Аляксандар Зялюткін. Нагнаеньне на дзяснах
Зялюткін — пячнік, бацька шасьцярых дзяцей ва ўзросьце ад 1 да 16 гадоў. Яму 42 гады. За кратамі Зялюткін 1 год і 9 месяцаў. Затрымалі за пратэсты ў Менску каля ўнівэрсаму «Рыга» 10 жніўня 2020 году. Далі 3,5 года калёніі.
Больш за тры месяцы Аляксандар адчувае моцны боль: у яго пачалося нагнаеньне на дзяснах і зьявіліся дзіркі ў зубах, паведамлялі праваабаронцы «Вясны» сёлета ў жніўні. Ад болю ён ня можа жаваць. Трапіць да стаматоляга ў яго не атрымалася. Ці ёсьць у вязьня абязбольваючыя лекі, невядома.
Адрас для лістоў: Турма № 4. 212011, г. Магілёў, вул. Крупскай, 99А. Аляксандр Уладзіміравіч Зялюткін.
6. Уладзімер Малахоўскі. Анкалягічная хвароба
Малахоўскі — сябар партыі БНФ, незалежны назіральнік за выбарамі, жыхар Віцебску. Яму 55 гадоў. Актывіст за кратамі ўжо 1 год і 8 месяцаў. Яго затрымалі за «гвалт у дачыненьні да міліцыянта». Далі 3,5 года калёніі.
Палітвязень хварэе на анкалёгію, мае 3 групу інваліднасьці. На волі ён пасьпеў прайсьці курс хіміятэрапіі. У лісьце зь СІЗА ён расказваў, што блага сябе адчувае, нямеюць рукі і ногі. Малахоўскага накіроўвалі на агляд у анкалягічны цэнтар. Па шпіталі яго вадзілі на ланцугу.
Адрас для лістоў: ПК № 22. 225295, Брэсцкая вобласць, г. Івацэвічы, ст. Даманава, а/с 20, Уладзімір Георгіевіч Малахоўскі.
7. Рыгор Кастусёў. Рак прастаты
Кастусёў — старшыня партыі БНФ, яму 65 гадоў. Палітыка затрымалі амаль паўтара года таму. Нядаўна яго асудзілі на 10 гадоў калёніі за «змову з мэтай захопу ўлады неканстытуцыйным шляхам».
Напрыканцы мінулага году ў Кастусёва за кратамі пацьвердзілі анкалёгію. З турмы ён перадаваў, што адчуваў сябе надзвычай кепска. Яго часова пераводзілі ў турэмны шпіталь. Праз хваробу Кастусёў меў моцныя болі, у зьняволеньні ён відавочна схуднеў.
Адрас для лістоў: СІЗА-1. 220030, г. Мінск, вул. Валадарскага, 2. Рыгор Андрэевіч Кастусёў.
8. Аляксандар Фядута. Падагра
Фядута — паліттэхноляг, літаратуразнаўца, яму 58 гадоў. Яго затрымалі амаль паўтара года таму. Далі 10 гадоў калёніі за «змову з мэтай захопу ўлады неканстытуцыйным шляхам».
«Схуднеў, дрэнна ходзіць, бо падагра адолела, дазволілі перадаць палку для хаджэньня ў СІЗА», — расказвала пра мужа жонка Марына Шыбко.
Праз кепскі стан здароўя судзьдзя дазволіла Фядуту адказваць на пытаньні седзячы (праўда, ён адмовіўся). Да таго ж празь ягоны стан здароўя пераносілі судовае паседжаньне.
Таксама Фядута змагаецца з наступствамі арытміі і пнэўманіі.
«Вельмі цяжка хварэў зімой — у яго два разы была пнэўманія, ня мог ляжаць, не мог спаць, яму нават дазвалялі сядзець ноччу, а днём ляжаць», — расказвала пра яго жонка.
Адрас для лістоў: СІЗА-1. 220030, г. Мінск, вул. Валадарскага, 2. Аляксандр Іосіфавіч Фядута.
9. Аляксей Галаўко. Патрэбная апэрацыя на нос
Галаўко — 21-гадовы жыхар Берасьця. Яго затрымалі паўтара года таму ў «справе берасьцейскіх анархістаў». Нядаўна Аляксею далі 12 гадоў, яго зьвінавацілі паводле чатырох артыкулаў.
«Выглядае Аляксей, як чалавек праз паўтара года зьняволеньня — стомлена. Хварэе. Ёсьць хранічныя праблемы з носам, якія патрабуюць хірургічнага ўмяшаньня», — расказала ягоная маці пасьля спатканьня з сынам.
Адрас для лістоў: СІЗА-1. 220030, г. Мінск, вул. Валадарскага, 2. Аляксей Ігаравіч Галаўко.
10. Яна Пінчук. Астма
Пінчук — 25-гадовая жыхарка Віцебску. Яе затрымалі ў Пецярбургу амаль год таму. У Беларусі яе абвінавацілі ва ўдзеле ў стварэньні апазыцыйных тэлеграм-каналаў. Яну экстрадавалі з Расеі ў Беларусь, дзе ёй пагражае да 20 гадоў калёніі.
Дзяўчына ўлетку цягам месяца моцна хварэла з тэмпэратурай і кашлем.
«Улічваючы хранічную астму Яны, гэта можа прывесьці да цяжкіх наступстваў», — мяркуе ейны муж Мікіта.
Таксама ўлетку ў Яны некалькі дзён балела рука, а потым яна перастала яе адчуваць і не магла ёю паварушыць.
11. Аліна Забаштанская. Эпілепсія
Забаштанская — палітзьняволеная ў «справе Зельцара», ёй 30 гадоў, ёсьць дзіця. За кратамі ўжо 10 месяцаў. Ёй далі 2 гады калёніі за камэнтары ў Tik-Tok, якія расцанілі як «абразу Лукашэнкі» і «распальваньне варожасьці». КДБ унёс палітзьняволеную ў «тэрарыстычны сьпіс».
Вядома, што ў Аліны эпілепсія.
Адрас для лістоў: СІЗА-1. 220030, г. Мінск, вул. Валадарскага, 2, Аліна Ігараўна Забаштанская.